Shymkentte eki jylda 46 shetel azamatyna neırohırýrgııalyq ota jasaldy
ShYMKENT. KAZINFORM – Shymkentte shetel azamattaryna kúrdeli neırohırýrgııalyq otalar jasalyp jatyr. Bul týraly qalalyq densaýlyq saqtaý basqarmasynyń basshysy Qaırat Qalıbekov brıfıngte málimdedi.
Onyń aıtýynsha, shetel azamattary kóbine joǵary tehnologııalyq medıtsınalyq kómek alý úshin júginedi.
Basqarma basshysynyń málimetinshe, Shymkent qalalyq № 2 aýrýhanasynda 2024-2025 jyldary 46 shetel azamatyna neırohırýrgııalyq ota jasalǵan.
— Onyń ishinde 22-si Tájikstannan, 14-i Ózbekstannan, 5-i Qyrǵyzstannan kelgen. Sondaı-aq Reseı, Shveıtsarııa, Mońǵolııa, Túrkııa jáne Moldova elderiniń azamattary da bar. Patsıentterdiń basym bóligi mı isikterin alyp tastaý, bet aımaǵyndaǵy aýyrsyný kezinde mıkrovaskýlıarlyq dekompressııa jasaý, mı tamyrlarynyń patologııalaryna baılanysty kúrdeli otalar úshin júgindi, — dedi Qaırat Qalıbekov.
Bıyldyń ózinde Shymkentte Tájikstannyń tórt, Ózbekstannyń eki azamatyna jáne Shveıtsarııadan kelgen bir patsıentke neırohırýrgııalyq ota jasalǵan.
Spıkerdiń sózinshe, kórshiles elderden keletin naýqastar sanynyń artýyna otandyq mamandardyń halyqaralyq tájirıbe almasý jumystary da yqpal etip otyr. Sonymen qatar medıtsınalyq qyzmet quny shetelmen salystyrǵanda qoljetimdi, al emdeý mekemeleri zamanaýı jabdyqtarmen qamtamasyz etilgen.
Buǵan deıin Qazaqstanda bir jylda júrekke 13 myńnan astam ashyq operatsııa jasalǵanyn jazǵan edik.
