Shymkentte eki ret egiz bosanǵan 36 jastaǵy áıel úshemdi dúnıege ákeldi
ShYMKENT. KAZINFORM — Shymkentte buǵan deıin eki ret egiz bosanǵan áıel úshemdi dúnıege ákelip, 10 balanyń anasy atandy. Osy joly otbasynda eki qyz ben bir ul dúnıege keldi.
Úshem 17 qyrkúıekte Shymkent qalalyq perınataldyq ortalyǵynda dúnıege kelgen. Sábılerdiń ekeýi — qyz, bireýi — ul. Týǵan kezdegi salmaqtary 1740, 1482 jáne 1730 gramm bolǵan. Ata-anasy olarǵa Alsııa, Safııa jáne Aımuhammed esimderin bergen.
Shala týǵan náresteler alǵashqy kúnderi jańa týǵan náresteler reanımatsııasy bóliminde em qabyldady. Keıin arnaıy kútim bólimine aýystyrylyp, dárigerlerdiń turaqty baqylaýynda boldy. Mamandardyń ýaqytyly kórsetken medıtsınalyq kómeginiń nátıjesinde sábılerdiń jaǵdaıy jaqsaryp, salmaqtary birtindep artqan.
— Qazirgi ýaqytta úshemniń jaǵdaıy qanaǵattanarlyq. Salmaqtary eki keliden asqan náresteler medıtsınalyq kórsetkishterge sáıkes úıine shyǵarylýǵa daıyndalyp jatyr, — dep habarlady Shymkent qalalyq densaýlyq saqtaý basqarmasy.
Úshem dúnıege kelgenge deıin otbasynda jeti bala tárbıelenip kelgen. Jańa týǵan sábılermen birge otbasyndaǵy bala sany 10-ǵa jetip otyr. Anasy Ajar úı sharýasymen aınalysady, al ákesi Turar — jeke kásipker.
Úshemge medıtsınalyq kómek kórsetken dárigerler qatarynda — ota jasaǵan D. Satov pen anestezıolog R.Madýsmanov bar. Reanımatsııa bóliminde sábılerge Aqzat Sholpanqulova, Perızat Sharıpova jáne Kamshat Ámirbekova kútim jasaǵan. Al arnaıy kútim bóliminde emdeýshi dáriger Aıgúl Sımaǵambetova men bólim meńgerýshisi Sandýǵash Nýranova nárestelerdiń jaǵdaıyn baqylaǵan.
Buǵan deıin Shymkentte 31 jastaǵy áıel úshem bosanyp, 7 balanyń anasy atanǵanyn jazǵan edik.
