Shymkentte eki bankrot kásiporynnyń 35 jumyskerge 45,8 mln teńge jalaqy bereshegi bar
ShYMKENT. KAZINFORM — Shymkentte úsh aıda eńbek salasynda 130-dan astam zań buzý anyqtaldy.
Ótken jyly Shymkentte 19 óndiristik jazataıym oqıǵa tirkelip, saldarynan 21 adam zardap shekken. Onyń ishinde 9 qyzmetker jumys ornynda kóz jumsa, 10-y aýyr, 2-i jeńil jaraqattanǵan.
Memlekettik eńbek ınspektsııasy Shymkent qalasy boıynsha departamentiniń málimetinshe, 2026 jyldyń alǵashqy úsh aıynda 107 nysanda 137 zań buzý anyqtalǵan.
— Nátıjesinde onyń 23-ine jalpy 3,7 mıllıon teńge aıyppul salyndy. Jalpy 6 jazataıym oqıǵa tirkelip, 6 adam zardap shekti, olardyń barlyǵy aýyr jaraqattanǵan. Tergep-tekserý jumystary júrgizildi. Árbir oqıǵa boıynsha materıaldar quqyq qorǵaý organdaryna joldandy, — dedi departament basshysynyń orynbasary Serik Alımanov.
Sonymen qatar jumysshylarǵa jalaqy tólemeı kelgen kásiporyndar da anyqtalǵan. Máselen, jyl basynda 3 kásiporynnyń 15 qyzmetkerge 25,3 mıllıon teńge bereshegi bolǵan. Eńbek ınspektsııasynyń aralasýymen bul qarjy tolyq qaıtaryldy.
— Alǵashqy toqsan qorytyndysy boıynsha Shymkent qalasynda jalaqy bereshegi tolyq joıyldy. 55 kásiporynnan 1680 jumyskerdiń paıdasyna 490,1 mln teńge jalaqy qaryzy óndirildi. Osylaısha 1680 jumyskerdiń buzylǵan eńbek quqyqtary qalpyna keltirildi, — dedi spıker.
Degenmen bankrot dep tanylǵan 2 kásiporynnyń 45,8 mln teńge jalaqy bereshegi áli ótelmegen.
— Atap aıtqanda «FEB stroı» JShS 2 jumyskerge 34,1 mln teńge, al «Shymkent qurylys» seriktestigi 33 jumyskerge 11,7 mln teńge qaryz. Atalǵan bereshekti túpkilikti óndirý maqsatynda kirister organdarymen birlesken jumystar atqarylyp jatyr, — dedi Serik Alımanov.
Budan buryn óndiristegi jazataıym oqıǵalardy tergeý protsesi tolyq avtomattandyrylǵanyn jazǵan edik.
