Shymkentte «Dıkıı Armannyń» aınalasyndaǵy adamdar sottaldy

ShYMKENT. KAZINFORM - Shymkentte daýly sot protsesi aıaqtaldy.

Arnaıy mamandandyrylǵan aýdanaralyq qylmystyq ister jónindegi sot alty aıyptalýshyǵa úkim shyǵardy. Olar aýyr qylmys jasaǵany úshin aıyptaldy. Atap aıtar bolsaq, bopsalaý, zańsyz bostandyqtan aıyrý, densaýlyqqa aýyr zııan keltirý, sondaı-aq atys qarýyn saqtaý jáne tasymaldaý.

Dıkıı Armannyń eń jaqyn aınalasyna qatysty is boıynsha basty fıgýranttardyń biri 1989 jyly týǵan Dáýir Táýkeev boldy. Bul qylmystyq is aıasynan tys ol buǵan deıin buqaralyq aqparat quraldarynda Arman Jumageldıevtiń, ıaǵnı «Dıkıı Armannyń» eń jaqyn serikteriniń biri retinde atalǵan. 2021 jyly Táýkeev basqa bir is boıynsha 5 jarym jylǵa bas bostandyǵynan aıyrylǵan bolatyn. Alaıda qazirgi is boıynsha Jumageldıevtiń, ıaǵnı Dıkıı Armannyń áreketterimen eshqandaı baılanys anyqtalǵan joq jáne bul sottalýshylarǵa taǵylǵan aıyptardyń quramyna engen joq.

Sot anyqtaǵandaı, S.A. 2018 jyldan 2023 jylǵa deıin jábirlenýshi Ó.N.-ǵa shamamen 50 mıllıon teńge qaryzǵa bergen. Qaryzyn qaıtara almaǵannan keıin, 2023 - 2024 jyldary S.A. jábirlenýshiden óz betimen 43 600 000 teńge alyp qoıǵan. Sonymen qatar, O.D., A.Ǵ. jáne T.E.-men birge Ó.N. men onyń dosy E.D.-ny qonaq úıler men jaldamaly páterlerde zańsyz ustaýdy uıymdastyryp, olardyń bostandyǵyn shektegen.

Bólek bir epızodta Táýkeev (T.D.) 2023 jylǵy qarasha aıynda kólik satyp alý syltaýymen sol jábirlenýshiden 2 mıllıon teńge «kórimdik» talap etip, kúsh qoldanamyn dep qorqytqan. Jábirlenýshi sharasyz kúıde oǵan 1 mıllıon teńge bergen.

Sondaı-aq, is materıaldarynda qarýdy zańsyz saqtaý deregi de kórsetilgen. O.A. Almaty qalasynda tapansha men oq-dárilerdi taýyp alyp, ony T.D.-ǵa kórsetken. Alaıda, qarý quqyq qorǵaý organdaryna tapsyrylmaǵan, osylaısha, ekeýi de atys qarýyn zańsyz ıelenip, saqtap jáne tasymaldaǵan.

Taǵy bir epızod 2024 jylǵy mamyrda Nazarbaev dańǵylyndaǵy dámhanada bolǵan janjalǵa qatysty. Tergeý málimetinshe, O.D. jábirlenýshi M.A.-nyń soqqylaryna jaýap retinde qajetti qorǵaný sheginen asyp, oǵan birneshe márte zatpen soqqy berip, aýyr dene jaraqatyn salǵan.

Sot tergeý barysynda qylmystyq istiń materıaldaryn, sonyń ishinde aıyptalýshylardyń, jábirlenýshilerdiń, kýálardyń jaýaptaryn, sot saraptamalarynyń nátıjelerin jáne zattaı dálelderdi qarastyrdy. Prokýror barlyq aıyptalýshyǵa bas bostandyǵynan aıyrý jazasyn taǵaıyndaýdy surady, tek O.D.-nyń áreketin jeńil qylmys retinde qaıta saralaýdy usyndy. Al jábirlenýshilerdiń keıbiri, taraptardyń tatýlasýyna baılanysty, jeńil úkim shyǵarýdy surady.

Sottyń úkimimen, S.A. — 4 jyl 8 aı bas bostandyǵynan aıyrý, T.D. (Dáýir Táýkeev) — 8 jyl bas bostandyǵynan aıyrý, O.A. — 4 jyl bas bostandyǵynan aıyrý, O.D. — 1 jyl shartty jaza (qylmystyq bap qaıta saralanǵannan keıin), A.Ǵ. — 1 jyl bas bostandyǵynan aıyrý,T.E. — taraptardyń tatýlasýyna baılanysty QR QK 68-baby negizinde jazadan bosatyldy.

Bul úkim áli zańdy kúshine engen joq. Іs fıgýranttarynyń jeke ómirine qatysty jekelegen málimetterge qaramastan, sot tek osy qylmystyq is sheńberindegi naqty áreketter men epızodtardy ǵana qarastyrdy. Eshbir sottalýshyǵa Arman Jumageldıevtiń qylmystyq áreketine qatysy bar degen aıyp taǵylǵan joq.

Aıta keteıik, budan buryn zańsyz qajylyq jasaǵandar jazalanatynyn jazǵan bolatynbyz.