Shymkentte departament basshysyna qatysty sotqa deıingi tergeý júrip jatyr
ShYMKENT. KAZINFORM – Ulttyq qaýipsizdik komıteti Halyqty áleýmettik qorǵaý salasyndaǵy retteý jáne baqylaý komıtetiniń Shymkent qalasy boıynsha departamentiniń basshysy Rýslan Tuńǵyshbaevqa qatysty sotqa deıingi tergep-tekserý bastalǵanyn rastady.
Buǵan deıin áleýmettik jelilerde shymkenttik sheneýnikke qatysty tergeý áreketteri júrip jatqany, onyń jumys ornynda tintý júrgizilgeni týraly aqparat taraǵan bolatyn.
Beıresmı málimetterge sáıkes, is QR Qylmystyq kodeksiniń 367-baby («Para berý») boıynsha tergelip jatyr. Taraǵan habarlamalarda sheneýniktiń órt qaýipsizdigi máseleleri boıynsha qorytyndy alý úshin laýazymdy tulǵaǵa aqsha berýi múmkin ekeni tekserilip jatqany aıtylǵan.
Ulttyq qaýipsizdik komıtetiniń baspasóz qyzmeti departament basshysyna qatysty tergeý áreketteri júrgizilip jatqanyn rastaǵanymen, istiń mán-jaıyna qatysty qosymsha aqparat berilmeıtinin málimdedi.
– Sotqa deıingi tergep-tekserý júrgizilip jatyr. Ózge aqparat Qylmystyq-protsestik kodekstiń 201-baby 1-bóligine sáıkes jarııa etýge jatpaıdy, – delingen UQK habarlamasynda.
43 jastaǵy Rýslan Tuńǵyshbaev 2023 jyldyń qazan aıynan beri Halyqty áleýmettik qorǵaý salasyndaǵy retteý jáne baqylaý komıtetiniń Shymkent qalasy boıynsha departamentin basqaryp keledi. 2024 jyldyń tamyz aıynda vedomstvo qaıta qurylyp, ataýy ózgergennen keıin ol bul laýazymǵa qaıta taǵaıyndalǵan.
Buǵan deıin Shymkenttiń eks-sheneýnikterine qatysty is taǵy sozylýy múmkin ekenin habarlaǵan edik.
