Shymkentte dendrosaıabaqqa kirý ýaqytsha shekteldi

ShYMKENT. KAZINFORM — Qalada qalyń qar men jańbyr, sondaı-aq aýa raıynyń kenetten ózgerýi saldarynan barlyq kommýnaldyq jáne apattyq qyzmetter kúsheıtilgen rejımge ótti. Kósheler, trotýarlar jáne qoǵamdyq oryndar kúndiz-túni úzdiksiz tazalanyp jatyr. Bul týraly qala ákimi áleýmettik jelidegi resmı paraqshasynda jazdy. 

Qala kóshelerindegi zardaptardy joıý úshin 462 arnaıy tehnıka jáne ortalyq magıstraldardy sanıtarlyq tazalaý úshin shamamen 5 myń jumysshy jumyldyryldy. Qazirge deıin magıstraldy kóshelerden shamamen 1345 tekshe metr qar shyǵaryldy. Jalpy 34 956 m³ qum jáne 21 myń tonna tuz qoldanyldy.

— Ylǵal qardyń jabysyp qalýy men jańbyrdyń áserinen aǵashtarǵa jáne abattandyrý elementterine túsetin júkteme aıtarlyqtaı artty. Saldarynan aǵashtardyń qulaý jaǵdaıy tirkelip otyr. Sondyqtan Dendrosaıabaqqa barý ýaqytsha shekteldi. Aǵashtardyń jaǵdaıyn baǵalaý jáne butaqtardyń qulaý qaýpin joıý jumystary júrgizilip jatyr. Bul jumystar aıaqtalǵan soń saıabaq qaıta ashylady, — dep jazdy Ǵabıt Syzdyqbekov resmı paraqshasynda.

Sonymen qatar, Jaılaý, Kóksaı, Bozaryq jáne Nursát shaǵynaýdandarynda elektr qýaty ýaqytsha óshirildi. Zardaptardy joıý jáne elektrmen jabdyqtaýdy qalpyna keltirý úshin 26 arnaıy tehnıka, 16 apattyq brıgada jáne 120 qyzmetker jumyldyrylǵan.

— Qaýipsizdik maqsatynda saıabaq pen gúlzarlarǵa barmaýdy, iri aǵashtardyń janynda turmaýdy jáne kólikterdi jasyl jelekter men konstrýktsııalar astyna qoımaýdy suraımyz. Turǵyndarǵa saqtyq sharalaryn qatań saqtaý, múliktiń qaýipsizdigin qamtamasyz etý jáne kólikti qaýipsiz jerlerge ornalastyrýdy aldyn ala uıymdastyrý usynylady. Qazir barlyq qyzmetter barynsha jedel jumys júrgizip jatyr, jaǵdaı turaqty baqylaýda, — delingen jazbada.

Budan buryn Shymkenttegi Qoshqarata ózeni arnasynan tasýy múmkin ekenin jazǵan edik.