Shymkentte dárihanalardaǵy egý bólmelerinde 4 adam qaıtys bolǵan
ShYMKENT. KAZINFORM – Shymkentte baqylaý sharalary barysynda medıtsına jáne farmatsevtıka salasynda birqatar zańbuzýshylyq anyqtaldy.
Medıtsınalyq jáne farmatsevtıkalyq baqylaý komıteti Shymkent qalasy boıynsha departamenti basshysynyń orynbasary Polat Berdalıevtyń aıtýynsha, ótken jyly qalada jekemenshik dárihanalardaǵy egý bólmelerinde jedel járdem kelgenge deıin 4 ólim jaǵdaıy tirkelgen.
Atalǵan derekter boıynsha zańdy tulǵalardan túsken shaǵymdar negizinde departament pen polıtsııa birlesip 13 jospardan tys tekserý júrgizgen.
– Anyqtalǵan kemshilikterge baılanysty 14 ákimshilik hattama toltyryldy. Egý bólmeleriniń ıelerin jınap, departamentte túsindirý jumystaryn júrgizdik. Olarǵa qyzmetterin zań talaptaryna sáıkestendirý qajettigi eskertildi. Atap aıtqanda, anafılaktıkalyq jaǵdaı týyndaǵan kezde egý bólmesinde jedel medıtsınalyq kómek kórsetý múmkindigi bolýy tıis. Bul úshin tıisti lıtsenzııa bolýy qajet. Sonymen qatar, dárigerge deıingi bilikti kómek kórsetý talap etiledi. Nátıjesinde talapqa saı kelmegen 12 egý bólmesiniń jumysy toqtatyldy, - dedi ol baspasóz máslıhatynda.
Sondaı-aq zeınetaqy qory qarajatyn paıdalaný máselesine baılanysty qaladaǵy 34 stomatologııalyq klınıka tekserilgen. Kemshilikter boıynsha 51 hattama toltyrylyp, aıyppul salyndy. Tekserý barysynda keıbir mekemelerdiń lıtsenzııasyz nemese mamandardyń tıisti sertıfıkatsyz qyzmet kórsetip otyrǵany belgili boldy.
Budan bólek, polıtsııamen birlesip júrgizilgen tekserýler barysynda bólshek saýdadaǵy dárihanalarda psıhotropty preparattardy zańsyz satý boıynsha 25 derek tirkelip, hattamalar toltyryldy. Sonymen qatar nashaqorlyqpen aýyryp, emdelýden bas tartqan 10 naýqas jaýapqa tartyldy.
Aıta ketsek, departament tarapynan júrgizilgen jospardan tys tekserýler nátıjesinde 331 hattama toltyrylyp, jalpy somasy 41 mln teńgeden astam aıyppul óndirilgen.
Budan buryn Shymkentte medıtsınalyq uıymdarǵa 1,1 mlrd teńge kóleminde aıyppul salynǵanyn jazǵan edik.
