Shymkentte dárigerler ishegi birneshe jerden tesilgen azamatty aman alyp qaldy
ShYMKENT. KAZINFORM — Naýqas aýrýhanaǵa aýyr hálde jetkizilgen. Tekserý barysynda onyń as ishegi 3-4 jerden tesilip, ish qýysyna ınfektsııa taraǵany anyqtaldy.
Osylaısha Shymkent qalalyq №1 klınıkalyq aýrýhananyń dárigerleri 38 jastaǵy azamatty ajaldan arashalap qaldy.
Dárigerlerdiń aıtýynsha, asqazannan ótken uzyndyǵy shamamen 3 santımetr bolatyn ótkir súıek ishekti tesip, perforatsııaǵa ákelgen. Sonyń saldarynan perıtonıt — ish perdesiniń jedel qabynýy bastalǵan. Naýqasta tamaq ótimsizdigi de baıqalǵan.
— Naýqasqa shuǵyl túrde hırýrgııalyq ota jasaldy. Mindetti áleýmettik medıtsınalyq saqtandyrý aıasynda ótken ota barysynda hırýrgter ishekti tesip turǵan súıekti alyp, zaqymdalǵan ishek bólikterin tigip, qalpyna keltirdi. Sondaı-aq ish qýysy tolyq tazartylyp, perıtonıttiń zardaptary joıyldy. Ota 1,5 saǵatqa sozylyp, jalpy jansyzdandyrýmen ótti. Qazirgi tańda naýqastyń jaǵdaıy turaqty, — dep habarlady Áleýmettik medıtsınalyq saqtandyrý qorynyń Shymkent qalasy boıynsha fılıaly.
Ota jasaǵan hırýrg-dáriger Nurǵalı Turlybaevtyń aıtýynsha, der kezinde kórsetilgen medıtsınalyq kómektiń arqasynda aýyr asqynýlardyń aldyn alý múmkin bolǵan.
Al naýqastyń ózi dárigerlerge kásibı sheberligi men medıtsınalyq kómegi úshin alǵysyn bildirdi.
Aıta keteıik, budan buryn Shymkentte dárigerler 4 jasar balanyń ishindegi úlken isikti kúrdeli otanyń kómegimen alyp tastaǵanyn jazǵan edik.