Shymkentte dárigerler bıikten qulaǵan naýqasqa sırek kezdesetin ota jasady

ShYMKENT. KAZINFORM – Shymkent qalalyq №1 klınıkalyq aýrýhananyń dárigerleri segizkóz súıegin qaıta qalpyna keltirý boıynsha joǵary tehnologııalyq otany sátti júrgizdi. Bul – elimizde sırek jasalatyn, kúrdeli ota.

Dárigerlerdiń aıtýynsha, 45 jastaǵy naýqas 5 metr bıikten qulap, segizkóz súıegin syndyrǵan. Súıek ekige bólingen mundaı jaraqat asa qaýipti sanalady. Sebebi, adamnyń júıke júıesine zaqym kelip, jambas qýysy aǵzalarynyń qyzmeti buzylady, sonyń saldarynan naýqastyń ómir boıy tósekke tańylyp qalý qaýpi bar.

– Kúrdeli ota barysynda dárigerler arnaıy qurylǵylardy qoldana otyryp, súıekti anatomııalyq qalpyna keltirdi. Bul ádis qazaqstandyq dárigerlerdiń ǵylymı eńbekteriniń nátıjesinde ázirlenip, dıssertatsııalyq deńgeıde zerttelgen. Travmatolog dárigerler brıgadasynyń kásibı sheberliginiń nátıjesinde operatsııa sátti ótti, – dep habarlady qalalyq densaýlyq saqtaý basqarmasy.

Qazirgi tańda naýqastyń jaǵdaıy turaqty, ol dárigerlerdiń baqylaýynda.

Budan buryn Almatyda egde jastaǵy naýqastarǵa narkozsyz júrek qaqpaqshasyn aýystyrý otasy jasalǵanyn jazǵan edik.