Shymkentte dárigerler 4 jasar balanyń ishindegi úlken isikti kúrdeli ota jasap, alyp tastady

ShYMKENT. KAZINFORM – Shymkent qalasynda dárigerler 4 jasar balaǵa kúrdeli ota jasap, ish qýysynan kólemdi qatersiz isikti sátti alyp shyqty.

Іshi qatty aýyryp, qusa bergen búldirshin klınıkalyq balalar aýrýhanasyna jetkizile sala jalpy qan taldaýy alynyp, ýltradybystyq zertteý (ÝDZ) júrgizildi.

– Daıyndyqtan keıin oǵan ota jasalyp, ish qýysynyń lımfangıomasy – sırek kezdesetin, biraq kólemi ulǵaıǵan jaǵdaıda ishki aǵzalardyń qyzmetine aıtarlyqtaı qaýip tóndiretin qatersiz isik anyqtaldy. Kólemi men otanyń kúrdeliligine baılanysty dárigerler laparotomııa ádisimen isikti tolyq alyp tastady. Sátti ótken otadan keıin búldirshin bólimshege aýystyrylyp, dárigerlerdiń turaqty baqylaýynda boldy. Qazirgi tańda jaǵdaıy qanaǵattanarlyq dep baǵalanyp, úıine shyǵarylǵan, – dep habarlady oblystyq densaýlyq saqtaý basqarmasy.

Mamandardyń aıtýynsha, mundaı otalar asqan dáldikti, kásibı tájirıbeni jáne zamanaýı medıtsınalyq jabdyqtardy talap etedi. Shymkent qalasyndaǵy medıtsınalyq uıymdarda sońǵy jyldary hırýrgııalyq kómektiń sapasyn arttyrýǵa, kúrdeli otalardy jergilikti deńgeıde jasaýǵa erekshe kóńil bólinip keledi.

Kúrdeli ota mindetti áleýmettik medıtsınalyq saqtandyrý júıesi aıasynda júrgizildi. Balalar aýrýhanasynda naýqastarǵa tegin medıtsınalyq kómektiń kepildendirilgen kólemi jáne MÁMS paketi sheńberinde medıtsınalyq qyzmetter tolyq kólemde kórsetilip jatyr.

Budan buryn Shymkentte alǵash ret óte sırek kezdesetin kúrdeli ota sátti jasalǵanyn jazǵan edik.