Shymkentte «DamDastour» halyqaralyq gastronomııalyq festıvali ótedi
ShYMKENT.KAZINFORM - 2026 jylǵy 21 naýryz kúni saǵat 12:00-de Shymkent qalasyndaǵy Ál-Farabı alańynda «DamDastour» halyqaralyq gastronomııalyq festıvali ótedi.
Atalǵan is-shara Naýryz merekesin atap ótý aıasynda uıymdastyrylyp, qala turǵyndary men qonaqtaryna ulttyq jáne álemdik ashananyń úzdik úlgilerin nasıhattaýǵa baǵyttalǵan.
Festıvalge Qazaqstannan jáne shetelden kelgen halyqaralyq deńgeıdegi 10 aspaz qatysyp, ózderiniń avtorlyq taǵamdaryn usynyp, aspazdyq sheberlikterin kórsetedi.
Festıval aıasynda kelesi nomınatsııalar boıynsha gastronomııalyq baıqaýlar uıymdastyrylady:
– úzdik káýap;
– úzdik palaý;
– úzdik samsa;
– úzdik ulttyq taǵam.
Sonymen qatar, is-sharaǵa shamamen 50 jergilikti meıramhana qatysyp, kelýshilerge túrli taǵamdar usynady.
Festıval tek gastronomııalyq sharalarmen shektelmeı, aýqymdy mádenı-oıyn-saýyq baǵdarlamasymen jalǵasady. Qonaqtardy street style jáne K-pop baǵyttaryndaǵy Dance Battle, dombyrashylar ansambliniń óner kórsetýi, batyrlar shoýy, tsırk qoıylymdary, motosherý jáne Moto Show, sporttyq avtokólikter kórmesi, sondaı-aq qolónershiler jármeńkesi kútedi.
Іs-shara birneshe taqyryptyq aımaqtarǵa bólinip uıymdastyrylady. Etnoaımaqta gastronomııalyq baıqaýlar men halyqaralyq aspazdardyń sheberlik sabaqtary ótedi, al eýropalyq aımaqta zamanaýı shoý-baǵdarlamalar, bı baıqaýlary jáne motoshoý usynylady. Sonymen qatar, Arbat aýmaǵynda kúni boıy qolónershiler kórmesi jumys isteıdi.
Festıvaldiń resmı ashylýy saltanatty túrde ótedi, al keshki ýaqytta jeńimpazdardy marapattaý rásimi men kontserttik baǵdarlama uıymdastyrylady. Baǵdarlamada otandyq ártisterdiń óner kórsetýi jáne arnaıy shaqyrylǵan hedlaınerdiń kontserti qarastyrylǵan.
«DamDastour» halyqaralyq gastronomııalyq festıvali — bul Naýryz merekesiniń atmosferasyn sezinýge, túrli halyqtardyń ashanasymen tanysýǵa jáne otbasy, dostarmen birge ýaqytty kóńildi ótkizýge múmkindik beretin aýqymdy mádenı shara.
