Shymkentte «Coca-Cola» brendimen jasalǵan kontrafaktilik ónimder anyqtaldy
ShYMKENT.KAZINFORM – Shymkent qalasyndaǵy bazarlardyń ibirnde jospardan tys tekserý kezinde «Coca-Cola» brendimen qoldan jasalǵan ónimderdi satý faktileri anyqtaldy, dep habarlaıdy qalalyq Ádilet departamentiniń baspasóz qyzmeti.
Baspasóz qyzmetiniń málimetterine qaraǵanda, tekserýge quqyq ıelenýshi — «The Coca-Cola Company» kompanııasynyń resmı ótinishi negiz boldy.
Kompanııa ózderiniń aıryqsha quqyqtarynyń buzylǵany jáne qala sórelerinde shyǵý tegi kúmándi ónimderdiń paıda bolǵany týraly málimdegen.
Qala bazarlarynyń aýmaǵynda júrgizilgen jospardan tys tekserýler barysynda kontrafaktilik salqyndatqysh sýsyndardyń iri partııasyn satý faktisi rastaldy.
Ónimderde qoldan jasaý belgileri, tańbalaý standarttarynyń buzylýy jáne quqyq ıelenýshiniń tıisti ruqsat qujattary bolmaı shyqty.
Anyqtalǵan faktiler boıynsha QR ÁQBtK-niń 158-baby (Bótenniń taýar tańbasyn, qyzmet kórsetý tańbasyn, taýar shyǵarylǵan jerdiń ataýyn nemese birtekti taýarlar nemese kórsetiletin qyzmetter úshin solarǵa uqsas belgilerdi zańsyz paıdalaný) boıynsha ákimshilik is qozǵaldy.
Іs materıaldary sotqa joldandy.
- Zııatkerlik menshik quqyqtaryn qorǵaý — basym mindet. Kontrafaktilik ónim quqyq ıelenýshilerge ekonomıkalyq nuqsan keltirip qana qoımaı, sonymen qatar sanıtarlyq normalardy saqtamaı óndiriletindikten, tutynýshylardyń densaýlyǵyna da qaýip tóndiredi, - delingen habarlamada.
Shymkent qalasynyń Ádilet departamenti kásipkerlerge kontrafaktilik taýarlardy satqany úshin jaýapkershilik bar ekenin eskertedi jáne mundaı tekserý is-sharalary júıeli túrde jalǵasatynyn habarlaıdy.
Osyǵan deıin EAEO elderi kontrafaktilik kontentke qarsy birlesken sharalar ázirlep jatqany týraly jazdyq.
