Shymkentte burynǵy «Qııal álemi» ornynda zamanaýı City Park paıdalanýǵa berildi
ASTANA.KAZINFORM - Qazaqstan Respýblıkasy Premer-mınıstriniń birinshi orynbasary Nurlybek Nálibaev Shymkent qalasyna jumys sapary barysynda qala kúni merekesine oraı júzege asyrylyp jatqan ınfraqurylymdyq birqatar mańyzdy jobamen tanysty, dep habarlaıdy Úkimettiń baspasóz qyzmeti.
Sapar aıasynda Nurlybek Nálibaev Shymkenttegi burynǵy «Qııal álemi» saıabaǵynyń ornynda boı kótergen jańa qoǵamdyq keńistik – City Park-tiń saltanatty ashylý rásimine qatysty. Ashylý saltanaty Shymkent qalasy kúnine arnalǵan merekelik baǵdarlamanyń basty oqıǵalarynyń biri boldy.
Joba qalalyq ortany keshendi jańǵyrtý aıasynda júzege asyrylyp, halyqtyń barlyq sanatyna qoljetimdi jańa zamanaýı qoǵamdyq keńistik qalyptastyrýǵa baǵyttalǵan.
Eske sala keteıik, aýmaǵy 4,89 gektar jer byltyr memleket menshigine qaıtarylyp, keıin abattandyrý jáne jańartý jumystary júrgizilgen.
Búginde City Park demalys, sport, mádenıet jáne qoǵamdyq belsendilik fýnktsııalaryn biriktiretin zamanaýı ýrbanıstik keńistikke aınaldy. Munda turǵyndar men qala qonaqtarynyń jaıly ári qaýipsiz demalýyna barlyq jaǵdaı jasalǵan.
Jańa saıabaq aýmaǵynda jastarǵa arnalǵan shyǵarmashylyq aımaqtar, túrli is-sharalar ótkizetin ashyq amfıteatr, demalys pen kezdesýlerge arnalǵan kópfýnktsıonaldy alańdar, ınteraktıvti sý elementteri, sondaı-aq, qalalyq festıvaldar men mádenı sharalarǵa arnalǵan keńistikter qarastyrylǵan.
Jobanyń mańyzdy baǵyttarynyń biri – sport ınfraqurylymyn damytý. Saıabaq aýmaǵynda jyl boıy jumys isteıtin muz aıdyny, ámbebap sport jáne oıyn alańdary, serýendeýge arnalǵan terrenkýr joldary, jasyl labırıntter men arnaıy jabdyqtalǵan baqylaý alańdary jasaqtalǵan.
City Park tujyrymdamasynyń mańyzdy bóligi – ınklıýzıvtilik qaǵıdaty. Jaıaý júrginshiler joldarynan bastap qoǵamdyq aımaqtarǵa deıingi barlyq abattandyrý elementi múmkindigi shekteýli jandardyń, egde jastaǵy azamattardyń jáne balalar arbasymen júretin ata-analardyń qajettilikterin eskere otyryp jobalanǵan.
Qazaqstan Respýblıkasy Premer-mınıstriniń birinshi orynbasary Nurlybek Nálibaev mundaı nysandardyń ashylýy Memleket basshysynyń jaıly qalalyq orta qalyptastyrý, zamanaýı ınfraqurylymdy damytý jáne azamattardyń ómir súrý sapasyn arttyrý jónindegi tapsyrmalarynyń júıeli túrde júzege asyrylýynyń nátıjesi ekenin atap ótti.
Sondaı-aq jumys sapary aıasynda Nurlybek Nálibaev Shymkent áýejaıynyń jańa termınaly men ekinshi ushý-qoný jolaǵy qurylysynyń barysymen tanysty.
Aıta ketý kerek, bul joba qalanyń áýejaıyn halyqaralyq deńgeıdegi zamanaýı mýltımodaldy habqa aınaldyrý baǵdarlamasynyń mańyzdy bóligi bolyp tabylady. Ushý-qoný jolaǵynyń uzyndyǵy 3 shaqyrymnan asady, al eni 75 metrdi quraıdy.
Jolaqtyń beriktigi joǵary jabyny aýyr júk tasymaldaıtyn áýe kemelerin qabyldaýǵa múmkindik beredi. Sonymen qatar halyqaralyq qaýipsizdik standarttaryna sáıkestikti qamtamasyz etýge erekshe kóńil bólingen.
Jańa jolaq kórinýi shekteýli nemese múlde kórinbeıtin jaǵdaıda da ushaqtardy qabyldaýǵa múmkindik beretin zamanaýı júıelermen jabdyqtalady. Bul óz kezeginde áýe qatynastarynyń turaqtylyǵy men senimdiligin edáýir arttyrady.
Aýqymdy jobany iske asyrý óńirdiń kólik ınfraqurylymyn damytýdaǵy mańyzdy kezeńge aınalyp, Shymkent qalasynyń áýe tasymaldarynyń strategııalyq ortalyǵy retindegi áleýetin kúsheıtedi.
Aıta keteıik, osyǵan deıin Nurlybek Nálibaev Petropavldaǵy birqatar strategııalyq nysandardy aralaǵan bolatyn.
