Shymkentte búlingen jol kólikterge zaqym keltirdi
ShYMKENT. KAZINFORM — Shymkentte Shubarkól kóshesinde jol jabyny shógip, kólik qozǵalysyna qaýip tóndirdi.
Áleýmettik jelide taraǵan vıdeoǵa sáıkes, Shymkentte joldyń ortasyndaǵy oıyqqa kólikter túsip, zaqymdanǵan. Júrgizýshiler jolda qaýipti jaǵdaı týyndaǵanyn aıtyp, eshqandaı eskertý belgileri qoıylmaǵanyna shaǵymdandy.
Osyǵan qatysty Shymkent qalasy jolaýshylar kóligi jáne avtomobıl joldary basqarmasy Kazinform tilshisine resmı túsinik berdi.
Vedomstvo málimetinshe, Shubarkól kóshesinde basqarmanyń tapsyrysymen «Bereke-Korporatsııa» JShS tarapynan 2024-2025 jyldary kúrdeli jóndeý jumystary júrgizilgen.
— Atalǵan kóshe boıynda káriz qubyry júıesiniń qudyqshalary ornalasqan. Jaýyn-shashyn áserinen jol jabyny shókken. Kepildik mindettemelerge sáıkes, kórsetilgen ýchaskede merdiger mekeme qalpyna keltirý jumystaryn bastap, jol qozǵalysy qaýipsizdigin qamtamasyz etý maqsatynda tıisti jol belgilerin ornatty. Alaıda sol kúni belgisiz avtokólik ornatylǵan shekteý belgilerin qaǵyp ketken, — delingen resmı aqparatta.
Saldarynan jol qozǵalysy qaýipsizdigine qaýip tónip, birqatar kólikke shyǵyn keldi. Qazirgi tańda atalǵan avtokólikti anyqtaý jáne izdestirý jumystary júrgizilip jatyr.
— Merdiger mekeme keltirilgen shyǵyndy óteý boıynsha tıisti sharalar qabyldap jatyr. Sonymen qatar, atalǵan mekenjaıda jol jabyny ýaqytsha qalpyna keltirilip, jol belgileri qaıta ornatyldy. Aldaǵy ýaqytta aýa raıy qolaıly bolǵan kezde asfaltobeton jabynyn tóseý jumystary júrgiziledi, — dep málimdedi vedomstvo ókilderi.
Budan buryn Shymkentte joldyń qaq ortasynda asfalt opyrylyp, sýǵa tolǵan tereń shuńqyr paıda bolǵanyn jazǵan edik.
