Shymkentte búldirshinniń óliminen keıin eki kásipker qamaýǵa alyndy

ShYMKENT. KAZINFORM — Oqıǵa «Turan-1» móltek aýdanynda boldy.

Keshkisin dalaǵa oınaýǵa shyqqan birinshi synyp oqýshysy Aıdyn Sáýirbaı úıine qaıtyp oralmaǵan. Іzdestirý jumystary barysynda jetkinshektiń denesi ishi sýǵa tola shuńqyrdan tabylǵan bolatyn.

Atalǵan aýmaqqa eki merdiger uıym jaýapty bolǵan. Olar shuńqyr qazǵan, biraq ony qorshamaı, qaýipsizdik sharalaryn saqtamaǵan. Kompanııalardyń basshylary qaýipsizdikti qamtamasyz etpedi degen kúdikpen ustaldy.

— Oqıǵa ornynda eshqandaı qorshaý nemese eskertý belgileri ornatylmaǵan. Kompanııa basshylary qamaýǵa alyndy, — delingen Shymkent qalalyq polıtsııa departamentiniń baspasóz qyzmeti usynǵan aqparatta.

Aıta keteıik, budan buryn atalǵan oqıǵaǵa baılanysty aýdan ákimi qyzmetinen bosatylǵan bolatyn.