Shymkentte bir jyl sabaqqa qatyspaǵan oqýshyǵa baǵa qoıylǵan

ShYMKENT. KAZINFORM — Shymkentte keıbir kolledjderde stýdentterdiń naqty qatysýy men resmı kórsetkishteri arasynda aıtarlyqtaı alshaqtyq anyqtaldy. Bir jyl boıy sabaqqa qatyspaǵan oqýshyǵa baǵa qoıylǵan derek te belgili boldy.

Bul týraly óńirlik kommýnıkatsııalar alańynda ótken brıfıngide Shymkent qalasy ákiminiń orynbasary, qala ákimdiginiń resmı ókili Sársen Quranbek aıtty.

— Keıbir kolledjderde 2 myń stýdent bilim alady dep kórsetilgenimen, naqty qatysýshylar sany áldeqaıda az, ıaǵnı 300-400 stýdent qana baryp júr. Memlekettik bıýdjetten qarjy alyp, grant ıelengenimen, sabaqqa qatyspaıtyn stýdentter jáne stıpendııasyn ózge tulǵalar alyp otyrǵan faktiler de kezdesedi. Sondaı-aq qaladaǵy bir mektepte oqıdy dep tirkelgen oqýshynyń sol ýaqytta shetelde bolǵany anyqtaldy, alaıda bir jyl boıy sabaqqa kelmegen oǵan baǵa qoıylyp kelgen. Atalǵan derek quzyrly organdarǵa joldandy, — dedi qala ákiminiń orynbasary.

Spıkerdiń aıtýynsha, bilim berý salasyndaǵy ashyqtyqty qamtamasyz etý maqsatynda jasandy ıntellektke negizdelgen «Aıqyn» aqparattyq júıesi tolyq engizilgen.

Intellektýaldy platforma mektep aýmaǵyndaǵy jalpy qaýipsizdikti qamtamasyz etip qana qoımaı, órt qaýipsizdigin baqylaýǵa, býllıng jaǵdaılaryn anyqtaýǵa, oqýshylardyń tegin tamaqpen qamtý protsesin jáne sabaqqa qatysýyn qadaǵalaýǵa múmkindik beredi.

— Joba aıasynda mektep kabınetteri men oqýshylar kóp shoǵyrlanatyn aýmaqtarǵa 10 400 jańa beınebaqylaý kamerasy ornatylyp, burynnan jumys istep turǵan 5 myń kameramen biriktirildi. Barlyq júıe Polıtsııa departamentiniń jedel basqarý ortalyǵyna qosylǵan. Bul jaýapty organdarǵa jaǵdaıdy onlaın rejımde baqylap, jedel sheshim qabyldaýǵa jol ashady. Mektepterden keıin endi kolledjderdiń árbir kabınetine beınekamera ornatý josparlanyp otyr. Qaladaǵy 98 memlekettik mektepke 392 dana «Alaqan mektep» apparattyq-baǵdarlamalyq kesheni ornatyldy. Júıe arqyly oqýshylar ashanaǵa kirgen sátte alaqan bıometrııasy arqyly avtomatty tirkeýden ótedi. Nátıjesinde naqty kórsetilgen qyzmetke ǵana tólem jasalyp, bıýdjet qarajatynyń maqsatty jumsalýy qamtamasyz etiledi, — dedi qala ákiminiń orynbasary.

Sonymen qatar bilim salasyndaǵy jemqorlyq táýekelderin azaıtý jáne qarjylyq baqylaýdy kúsheıtý maqsatynda QARQYN baǵdarlamasy iske qosyldy.

Joba mektepke deıingi, qosymsha, jalpy orta, tehnıkalyq jáne kásiptik bilim berý uıymdaryn tolyq qamtıdy. Inklıýzııa, kadr, qarjy, býhgalterııa jáne qujat aınalymy baǵyttary da tsıfrlyq formatqa kóshirilgen. Júıe Kundelik, 1S, Balabaqsha, Qosymsha, Pana, Smartnation, Sana platformalarymen biriktirilgen jáne aqparattyq qaýipsizdik talaptaryna saı jumys isteıdi.

Budan buryn Shymkentte bilim berý uıymdarynda 700 mln teńgeden astam qarjy zańsyz tólengenin jazǵan edik.