Shymkentte boıjetkenniń óliminen keıin polıtsııa qyzmetkerlerine qatysty is qozǵaldy

ASTANA. KAZINFORM — Shymkentte boıjetkenniń óliminen keıin óz qyzmetine selqos qarady degen kúdikpen polıtsııa qyzmetkerlerine qylmystyq is qozǵaldy. Bul týraly QR Іshki ister mınıstriniń orynbasary Sanjar Ádilov málim etti.

- Osy derek aıasynda óz qyzmetine selqos qaraý belgileri boıynsha qylmystyq is qozǵadyq. Ol boıynsha tergeý amaldaryn QR ІІM Ózindik qaýipsizdik departamenti bastady. Atap aıtqanda, qylmystyq isti tirkeý jáne kúdiktini qylmystyq jaýapkershilikke tartý jóninde tıisti sharalar qoldanbaǵan polıtsııa qyzmetkerlerine qatysty bolady, - dedi S. Ádilov Senatta tilshiler suraǵyna jaýap bere otyryp.

Onyń aıtýynsha, birinshi kezekte polıtsııanyń aýdandyq basqarmasyndaǵy laýazymdy qyzmetkerleriniń jaýapkershiligi qarastyrylyp jatyr. Sondaı-aq tergeý aıasynda qalalyq Polıtsııa departamenti basshylyǵynyń jumysyna da quqyqtyq baǵa beriledi.

Eske salsaq, Prezıdent Qasym-Jomart Toqaev Shymkenttegi boıjetkenniń ólimine qatysty Bas prokýratýraǵa tapsyrma berdi.

20 qańtar kúni Іshki ister mınıstrligi Shymkent polıtsııa departamentinde kadrlyq sheshimder jasaǵanyn málim etti. Bul sheshimder 21 jastaǵy stýdent Nuraı Serikbaıdyń óliminen keıin qabyldandy.

Shymkenttiń polıtsııa bastyǵy jáne onyń orynbasary qyzmetinen ketti.

Aıta keteıik, marqum N. Serikbaıdyń ólimine kúdikti retinde 28 jastaǵy Shymkent qalasynyń turǵyny ustalyp, ýaqytsha ustaý ızolıatoryna qamaldy.

21 jastaǵy Nuraı Serikbaıdyń pyshaq jaraqattarynan qaza tabýyna qatysty, marqumnyń týǵan-týystary qaıǵyly oqıǵanyń aldyn alýǵa múmkindik bolǵanyn málimdedi. Olardyń aıtýynsha, marqum qýdalaý men qorqytý derekteri boıynsha birneshe ret kómek surap quqyq qorǵaý organdaryna júgingen, alaıda joldanǵan ótinishter tıisti deńgeıde qaralmaǵan.