Shymkentte bosanǵan áıeldiń qaıtys bolýy boıynsha tergeý bastaldy
ShYMKENT. KAZINFORM — Shymkentte bosanǵannan keıin qaıtys bolǵan 28 jastaǵy Zarına Sultannyń ólimine qatysty qylmystyq is qozǵaldy. Bul týraly qalalyq polıtsııa departamenti málimdedi.
Polıtsııanyń habarlaýynsha, atalǵan derek boıynsha qazirgi tańda keshendi tergeý sharalary júrgizilip jatyr. Oqıǵanyń naqty mán-jaıyn anyqtaýǵa baǵyttalǵan tergeý aıaqtalǵannan keıin is boıynsha protsessýaldyq sheshim qabyldanatyn bolady.
— Atalǵan jaıtqa qatysty Medıtsınalyq jáne farmatsevtıkalyq baqylaý komıtetiniń departamenti tekserý júrgizip jatyr. Ózge aqparat QR QPK-niń 201-babyna sáıkes tergeý múddesinde jarııa etýge jatpaıdy, — delingen Shymkent qalasy polıtsııa departamentiniń baspasóz qyzmeti usynǵan aqparatta.
Aıte keteıik, marqum 20 tamyz kúni ul balany dúnıege ákelgen. Alǵashynda jaǵdaıy qalypty bolǵanymen, kóp uzamaı qaıtys boldy. Týystary medıtsınalyq baqylaý bolmaǵanyn aıtyp, dárigerlerdi kinalap otyr.
Aıta keteıik, budan buryn Túrkistan oblysynda ana ólimi eki esege óskenin jazǵan bolatynbyz.