Shymkentte bilim salasynda oqý júktemesi men ústemaqylarǵa 3 mlrd teńgeden astam qarjy zańsyz eseptelgen
ShYMKENT. KAZINFORM – Shymkent qalasynda bilim berý salasyn tsıfrlandyrýǵa baǵyttalǵan Qarqyn jobasy aıasynda birqatar zań buzýshylyq anyqtaldy.
Tsıfrlyq taldaý nátıjesinde eńbekaqy tóleý júıesi men balalar kontıngentin esepke alý kezindegi sáıkessizdikter jáne qaıtalanatyn vaýcherler faktileri tirkeldi.
Qalalyq bilim basqarmasynyń málimetinshe, 2025-2026 oqý jylynda bilim berý uıymdaryndaǵy eńbekaqy tóleý júıesinde 1 mlrd 709 mln teńge kóleminde artyq oqý júktemeleri jáne 1 mlrd 298 mln teńge kóleminde óńirlik ústemaqylar boıynsha sáıkessizdikter anyqtalǵan.
– Prokýratýra «Qarqyn» jobasy arqyly anyqtalǵan sáıkessizdikterge baılanysty usynys engizdi. Nátıjesinde birqatar bilim berý uıymdarynda qarjyny qaıtarý jáne basshylaryna qatysty tıisti sharalar qabyldaý jumystary júrgizildi, – dedi qalalyq bilim basqarmasynyń basshysy Qýanysh Ysqaqov.
Onyń aıtýynsha, balalar kontıngentin taldaý barysynda basqa óńirlerde tirkelgen 2808 bala jáne ózge aımaqtardyń medıtsınalyq uıymdaryna tirkelgen 2228 bala anyqtalǵan.
Budan bólek mektepke deıingi uıymdarda 2261, qosymsha bilim berý uıymdarynda 6758 balanyń negizsiz shyǵarylǵany, sondaı-aq 8524 qaıtalanatyn vaýcher bary belgili bolǵan.
– Negizsiz shyǵarylǵan balalarǵa qatysty aıtar bolsaq, pılottyq jobaǵa ótken kezde atalǵan balalar belgisiz sebeptermen rastaý kezeńinen ótpeı, júıege engizilmegen. Ata-analar tarapynan da qaıta tirkelýge ótinim túspegen. Sondyqtan bul sanattaǵy balalar esepten shyǵaryldy, – dedi spıker.
Buǵan deıin Shymkenttegi 83 mektepte muǵalimderdiń júktemesi normadan asyp ketkeni týraly habarlaǵan edik.
