Shymkentte bilim berý uıymdarynda 700 mln teńgeden astam qarjy zańsyz tólengen

ShYMKENT. KAZINFORM — Shymkentte aılyǵy tómen 2800-den astam kishi qyzmetkerge óńirlik ústemeaqy tóleý tártibi buzylǵan. 

Qala ákiminiń orynbasary, ákimdiktiń resmı ókili Sársen Quranbektiń aıtýynsha, Shymkenttegi bilim berý uıymdarynda aılyǵy tómen kishi qyzmetkerlerge jergilikti bıýdjet esebinen tólenetin óńirlik ústemeaqyny berý tártibi 211 uıymda saqtalmaǵan.

— Nátıjesinde 2845 qyzmetkerge qatysty zań buzý anyqtalyp, keıbirine ústeme múlde tólenbegen, keıbirine tolyq emes kólemde berilgen, al keıbir qyzmetkerlerge tıesili bolmasa da ústemeaqy tólenip kelgen. Osy zańsyzdyqtardyń saldarynan 700 mln teńgeden astam qarajattyń artyq tólengeni belgili boldy. Bul qarjyny bıýdjetke qaıtarý boıynsha quzyrly organdarǵa tıisti aqparat joldandy, — dedi qala ákiminiń orynbasary.

Sonymen qatar ákimdiktiń resmı ókili qaladaǵy 2 myńǵa jýyq bos jumys ornynyń jarııalanbaǵanyn atap ótti. Atalǵan zań buzý bilim berý uıymdaryna jumysqa ornalasý protsesin qıyndatqan.

— Qazirgi tańda Shymkent qalasyndaǵy bilim berý uıymdarynda jalpy sany 2 063 bos jumys orny bar. Pedagogtardy jumysqa qabyldaý Oqý-aǵartý mınıstrliginiń buıryǵyna sáıkes júzege asyrylýy tıis bolǵandyqtan, barlyq bos oryndarǵa konkýrs ótkizýdi ortalyqtandyrý týraly sheshim qabyldanǵan. Osy maqsatta mektepterden bilikti mamandar iriktelip, 15 toptan turatyn arnaıy komıssııa jasaqtaldy. Bul komıssııalar konkýrs barysynyń ádil ári ashyq ótýin qadaǵalaıdy. Osyǵan baılanysty 29-30 qańtar kúnderi bos jumys oryndary jármeńkesi ótkiziledi, — dedi ol.

Budan buryn Shymkentte mekteptiń bas býhgalteri 400 mln teńgeden astam qarjyny jymqyrǵanyn jazǵan edik.