Shymkentte bilim berý resýrstaryn tıimdi basqarý máseleleri talqylandy
ShYMKENT. KAZINFORM — Shymkentte bilim berý resýrstaryn tıimdi paıdalaný, qarjylyq tártipti jetildirý jáne tsıfrlyq baqylaý tetikterin damytý máseleleri talqylandy. 15 qazanda bastalǵan óńiraralyq tájirıbelik semınar-keńes qosymsha bilim berýge arnalǵan biryńǵaı memlekettik tapsyrysty iske asyrý tájirıbesin taratýǵa arnaldy. Jıyn Qazaqstan Respýblıkasy Oqý-aǵartý mınıstrliginiń bastamasymen uıymdastyryldy.
Semınarǵa ortalyq memlekettik organdardyń, «Qazaqtelekom» AQ men «Qarjy ortalyǵy» AQ-nyń ókilderi, elimizdiń 11 óńirinen ákim orynbasarlary, sondaı-aq bilim berý, ekonomıka, tsıfrlandyrý, sport jáne mádenıet salalarynyń basshylary men mamandary qatysty. Kezdesýde bıýdjet qarajatyn utymdy paıdalaný, bilim berý qyzmetteriniń qoljetimdiligin arttyrý jáne memlekettik tapsyrysty baqylaý máseleleri qaraldy.
Shymkent qalasy ákiminiń orynbasary Sársen Quranbek bilim berý júıesin damytýda qolda bar resýrstardy tıimdi basqarýdyń mańyzyna toqtaldy. Onyń aıtýynsha, salanyń turaqty damýy úshin qarjylandyrý kólemimen qatar, qarajattyń maqsatty jumsalýy men basqarýshylyq sheshimderdiń nátıjeliligine de basymdyq berilýi kerek.
— Bilim berý júıesin damytýda eń aldymen qolda bar múmkindikterdi durys baǵalap, resýrstardy naqty qajettilikke qaraı baǵyttaý mańyzdy. Bul rette qarjylyq tártipti kúsheıtip qana qoımaı, josparlaý men baqylaý jumystaryn jetildirý qajet. Árbir basqarýshylyq sheshim naqty nátıjege negizdelip, balalardyń sapaly ári qoljetimdi bilim alýyna yqpal etýge tıis, — dedi Sársen Abaıuly.
Qalada bilim berý salasyn jetildirýdiń negizgi baǵyttarynyń biri — resýrstar tapshylyǵy jaǵdaıynda qoldanystaǵy ınfraqurylymnyń múmkindigin barynsha tıimdi paıdalaný. Bul rette bilim berý uıymdarynyń qajettilikterin júıeli baǵalaý, qarjylandyrýdy josparlaý jáne bólingen qarajattyń nátıjesin baqylaý ózekti bolyp otyr. Nysanaly ındıkatorlarǵa qol jetkizý úshin atqarylǵan jumystyń kólemin ǵana emes, onyń sapalyq kórsetkishterin de eskerý qajet.
Semınar barysynda tsıfrlyq baqylaý quraldaryn engizý máselesi de keńinen sóz boldy. Shymkent qalasynda qosymsha bilim berýge arnalǵan biryńǵaı memlekettik tapsyrystyń pılottyq jobasy aıasynda balalar týraly qaıtalanatyn jazbalardy joıý, qyzmet kórsetilgenin rastaý jáne qarjylandyrýdy naqty qyzmet alýshymen baılanystyrý tetikteri engizilgen. Sonymen qatar, memlekettik mektepterdiń bos qýattaryn paıdalaný arqyly balalardy qosymsha bilimmen qamtýdy keńeıtý joldary qarastyryldy.
