Shymkentte bıznes granttardyń sany boıynsha qyzmet kórsetý salasy aldyńǵy orynǵa shyqty

ShYMKENT. KAZINFORM - Memlekettik qoldaýdyń alǵashqy tolqyny aıasynda kásipkerlik jobalardy iske qosýǵa 134 ótinim maquldandy.

Baǵdarlamaǵa qatysý úshin barlyǵy 934 ótinim qabyldanǵan, onyń ishinde arnaıy komıssııa 134 ótinimdi maquldady. Árbir jeńimpaz óz kásibin bastaý úshin memlekettik qoldaý aıasynda qarastyrylǵan 1 572 800 teńgege deıingi (400 AEK) grantqa ıe boldy.

— Grant ıegerleriniń basym bóligi – áleýmettik osal toptardyń ókilderi. Olardyń qatarynda ataýly áleýmettik kómek alatyn bes adam, asyraýshysynan aıyrylǵan jeti adam, eńbekke qabiletti múgedektigi bar 23 azamat, kópbalaly otbasylardan shyqqan 71 adam jáne erekshe qajettilikteri bar balalardy tárbıelep otyrǵan 28 ata-ana bar, — dep habarlady qalalyq eńbek mobıldiligi ortalyǵynyń mamandary.

Qoldaý tapqan jobalar túrli baǵyttardy qamtıdy. Eń tanymal sala – qyzmet kórsetý boldy. Bul baǵytta 50 joba maquldandy.

Basqa baǵyttar qatarynda:

-óndiristik jobalar (qulpynaı ósirý, et ónimderin qaıta óńdeý) – 39 joba;

-tigin isi – 15 joba;

-naýbaıhana jáne kondıterlik ónimder – 14 joba;

-jartylaı fabrıkattar óndirisi – 9 joba;

-mal jáne qus sharýashylyǵy – 2 joba;

-jıhaz óndirý – 1 joba;

-ózge baǵyttar (fastfýd, sýsyndar, shujyq ónimderi) – 4 joba.

Grant ıegerleri eńbek mobıldiligi ortalyǵymen ekijaqty kelisimshartqa qol qoıdy. Qazirgi ýaqytta qarajatty aýdarýǵa daıyndyq júrgizilip jatyr.

Ata keteıik, budan buryn Shymkenttiń sý sharýashylyǵy nysandary memleket menshigine qaıtarylǵanyn jazǵan bolatynbyz.