Shymkentte bıylǵy alǵashqy úshem dúnıege keldi
ShYMKENT. KAZINFORM – Shymkent qalalyq №2 aýrýhanaǵa qarasty perzenthanada úshem dúnıege keldi.
Shymkenttiń 22 jastaǵy turǵyny Jamılıa 2 ul, 1 qyzdy dúnıege ákeldi. Nárestelerdiń salmaǵy 2 770, 2 410 jáne 2 095 gramm boldy. Bul – otbasyndaǵy tuńǵysh sábıler.
Dárigerler kesar tiligi arqyly ota jasap, bosandyryp alǵan.
Merziminen buryn dúnıe esigin ashqan nárestelerge jansaqtaý bóliminiń mamandary tarapynan erekshe kútim jasaldy. Qazirgi tańda jaǵdaılary birqalypty.
Bıylǵy alǵashqy úshem men anasyn dárigerler búgin perzenthanadan saltanatty túrde shyǵaryp saldy.
Aıta keteıik, 2024 jyly Shymkentte 28 936 sábı dúnıege kelgen – 14 837 ul bala jáne 14 099 qyz bala.
Buǵan deıin 56 jastaǵy Shymkent turǵyny balasyna bir búıregin bergenin jazǵan bolatynbyz.