Shymkentte bıyl jazǵy lagerlerde qansha oqýshy demalady
ShYMKENT. KAZINFORM — Shymkentte balalar demalysyna qala bıýdjetinen 755 mln teńgeden astam qarjy bólingen.
Bıyl Shymkent qalasynda jalpy orta bilim berý uıymdaryndaǵy 262 790 oqýshynyń 245 753-in jazǵy demalyspen qamtý josparlanyp otyr.
Qalalyq bilim basqarmasynyń málimetine súıensek, oqýshylardyń 11 495-i jergilikti bıýdjet qarajaty esebinen, 9 516-sy ata-analar men demeýshilerdiń qoldaýymen, al 102 bala kásipodaq uıymy arqyly qala syrtyndaǵy lagerlerde demalady. Budan bólek 224 640 bala mektep janyndaǵy alańdarda ýaqytyn tıimdi ótkizbek.
— Jazǵy kezeńde joǵary oqý oryndary jáne tehnıkalyq-kásiptik bilim berý uıymdarymen birlesip, 7-8 synyp oqýshylaryna arnalǵan «PROF START» jobasy men 9-10 synyp oqýshylaryna arnalǵan «EduCampShym» jobasy júzege asyrylady. Atalǵan jobalar aıasynda 60 105 oqýshy qamtylady, — dedi qalalyq bilim basqarmasy basshysynyń orynbasary Gúlnar Dáribaeva.
Sondaı-aq jaz aılarynda 11 myńnan astam balanyń qala syrtyndaǵy lagerlerde demalyspen qamtýǵa bıýdjetten 755 mln 243 myń teńge bólingen. Bul rette memlekettik qoldaýǵa muqtaj, ata-anasynyń qamqorlyǵynsyz qalǵan, kópbalaly, tolyq emes jáne az qamtylǵan otbasylardan shyqqan balalarǵa basymdyq beriledi.
Atalǵan qarjy aıasynda az qamtylǵan otbasylardan shyqqan 11 200 bala jazǵy saýyqtyrý lagerlerimen qamtylady. Onyń ishinde 1200 bala bilim basqarmasyna qarasty «Aqsý» lagerinde demalsa, taǵy 10 myń bala memlekettik satyp alý konkýrsy arqyly anyqtalǵan lagerlerge jiberiledi.
Sonymen qatar daryndy balalarǵa arnalǵan mektepterdiń 160 oqýshysy jazǵy demalyspen qamtylady. Al balalar úıiniń 135 tárbıelenýshisi qala syrtyndaǵy lagerlerde úsh aı boıy tynyǵady.
Aıta keteıik, 2026 jylǵy 1 sáýirden bastap elimizde alǵash ret balalar saýyqtyrý ortalyqtarynyń qyzmetin lıtsenzııalaý júıesi engizildi.
