Shymkentte bıyl múgedektigi bar qansha adam jumyspen qamtylady
ShYMKENT. KAZINFORM — Shymkentte jyl basynan beri múgedektigi bar 156 azamat jumyspen qamtý sharalaryna tartylyp, onyń 61-i turaqty jumysqa ornalasty.
Qazirgi tańda Shymkent qalasynda 43 086 múgedektigi bar adam tirkelgen.
Qala ákiminiń orynbasary, ákimdiktiń resmı ókili Sársen Quranbektiń aıtýynsha, bıyl Shymkentte 985 múgedektigi bar adamdy jumyspen qamtýdyń belsendi sharalaryna tartý josparlanǵan.
— Jyl basynan beri bul baǵytta 156 azamat jumyspen qamtýdyń túrli sharalaryna joldandy. Onyń ishinde 61 adam turaqty jumysqa ornalassa, 39 azamat «Bastaý bıznes» jobasyna qatysyp, 2 adam «Kúmis jas» baǵdarlamasyna tartyldy. Sondaı-aq 50 adam qoǵamdyq jumystarǵa, 4 jas maman jastar praktıkasyna joldandy, — dedi ol.
Spıkerdiń sózinshe, qala ákiminiń qaýlysyna sáıkes múgedektigi bar azamattardy jumyspen qamtý úshin 34 mekemede 165 jumys ornyna kvota belgilengen. Búgingi kúnge deıin 11 mekemede 18 azamat turaqty jumysqa ornalasqan.
Sonymen qatar, ata-anasynyń qamqorlyǵynsyz qalǵan jáne bilim berý uıymdarynyń túlekteri úshin segiz jumys ornyna kvota belgilengen.
— Josparlanǵan segiz adamnyń beseýi turaqty jumysqa ornalasty. Qazirgi tańda 2025 jyly oqýyn aıaqtaǵan jáne bıyl bitiretin túlekterdiń tizimderi jasaqtalyp, aldaǵy ýaqytta olarǵa iri kásiporyndarda tanystyrý kezdesýleri, jumys barysymen tanysý sharalary jáne jastar ortalyǵymen birlesken bos jumys oryndarynyń jármeńkeleri uıymdastyrylatyn bolady, — dedi qala ákiminiń orynbasary.
Budan buryn múgedektigi bar adamdar Áleýmettik qyzmetter portaly arqyly 111 myńnan astam qyzmet alǵanyn jazǵan edik.
