Shymkentte bıyl 3,5 mln-nan astam gúl egiledi

ShYMKENT. KAZINFORM – Shymkent qalasy bıyl kóktemde gúl egý boıynsha óz rekordyn jańartýdy josparlap otyr. Qala kóshelerine 3,5 mıllıonnan astam gúl egilmek. Bul kórsetkish ótken jylmen salystyrǵanda birneshe ese kóp. 

Qalalyq jaıly ortany damytý basqarmasynyń málimetinshe, gúl egý jumystary naýryz aıynda bastalady. Kóshetter ortalyq kóshelerge, saıabaqtar men skverlerge otyrǵyzylyp, shahardyń kórkin asha túspek.

Bıylǵy basty erekshelik – qala keńistigin bezendiretin lavanda men salvııadan jasalǵan biregeı kompozıtsııalar. Bul ósimdikter tek ashyq túsimen ǵana emes, erekshe hosh ıisimen de turǵyndardy qýantpaq.

– Biz bıyl Shymkent qalasy aýmaǵyna 1 mln 600 kópjyldyq jáne 2 mln birjyldyq gúlder egýdi josparlap otyrmyz. Jyldaǵy petýnııa gúlderi túrli tústi bolady. Sonymen qatar biz qala aýmaǵyna 1 mln 600 qyzǵaldaq gúlin ektik. Shymkent qalasynyń sımvoly retinde biz jyl saıyn egemiz, - dedi qalalyq jaıly ortany damytý basqarmasynyń ókilderi.

Gúlderdiń basym bóligi jergilikti jylyjaılarda ósirilgen. Olar Qonaev dańǵyly, Temirlan tas joly, Báıdibek bı kóshesi jáne ózge de negizgi kóshelerge otyrǵyzylmaq.

Aıta keteıik, mundaı aýqymdy jumystar demeýshilerdiń qoldaýymen júzege asyrylyp jatyr.

Budan buryn Qarataý baýraıynda kóktem lebi sezilip, báısheshek gúldegenin jazǵan edik.