Shymkentte bes aýdannyń turǵyndary 9 jyldan keıin ystyq sýǵa qol jetkizdi

ASTANA. KAZINFORM - Shymkentte 2015 jyldan beri jazǵy ýaqytta ystyq sýsyz otyrǵan turǵyndardyń máselesi sheshildi. Teriskeı, Saıram, Kúnshyǵys, Otyrar jáne 18 shaǵynaýdan turǵyndary endi jyl boıy ystyq sýdy paıdalanatyn boldy, dep habarlaıdy qalalyq ákimdiktiń baspasóz qyzmeti. 

Buǵan deıin atalǵan shaǵynaýdan turǵyndary tek qysqy jylý maýsymynda ystyq sýdy qoldanyp kelgen. Kópqabatty 238 úı turǵyndarynyń atalǵan máseleni aıtyp, talaı jyldan beri barmaǵan jeri qalmapty. Bıyl da turǵyndar qala ákiminiń qabyldaýynda osy máseleni sheship berýdi ótingen. Ákim óz kezeginde máseleni ońtaıly sheshýge ýáde bergen bolatyn.

Qala ákiminiń tapsyrmasy boıynsha osy turǵyn úılerdi jyl boıy ystyq sýmen qamtamasyz etý úshin QR-3 jergilikti qazandyǵy men qubyr baılamy jańǵyrtyldy. Nátıjesinde Teriskeı, Saıram, Kúnshyǵys, Otyrar jáne 18 shaǵynaýdan turǵyndary ystyq sýǵa qol jetkizip qýanysýda.

«Búingi kúni men sýymdy qosyp, sondaı rıza bolyp otyrmyn. Ystyq sý keremet, qysta da mundaı sý bolmaǵan. Men bul turǵyn úı paıdalanýǵa berilgennen bastap osy úı turǵynymyn. Shynymdy aıtsam, osy ýaqytqa deıin janaıqaıymyzdy eshkim estimedi. Aıttyq, jazdyq. 2015 jyldan beri kórgen qıyndyǵymyzdyń búgin qýanyshymen bólisip otyrmyz. Biz óte qýanyshtymyz», - dedi Saıram shaǵynaýdanynyń turǵyny Naǵıma Jampozova.

Turǵyndardyń aıtýynsha, sýdyń jylý temperatýrasy da, qysymy da jaqsy.