Shymkenttegi «Alash» bazary saýdagerleriniń máselesi qalaı sheshiledi
ShYMKENT. KAZINFORM — Áleýmettik jelilerde «Alash» bazarynyń mańynda turǵyndardyń kólik júretin joldy bógep, narazylyq bildirgen vıdeosy jarııalandy.
Jelide taraǵan aqparatqa sáıkes, bul jaǵdaı bazardaǵy saýda núktelerin qaıta jańartý jumystaryna qatysty týyndaǵany aıtylǵan.
Atalǵan bazardyń qyzmetine qatysty túrli aqparattardyń taralýyna baılanysty Shymkent qalasy ákimdiginiń ókilderi resmı túsinik berdi.
Olardyń málimetinshe, bazar aýmaǵynda 200-den astam bir qabatty, eskirgen saýda núktelerinen turatyn saýda pavılonyn jańǵyrtý jáne qaıta jańartý jumysy josparlanǵan.
— Bul saýda oryndarynyń qaýipsizdigin, sanıtarlyq talaptarǵa sáıkestigin jáne kelýshilerge qolaıly jaǵdaı jasaý maqsatynda júrgiziledi, — dep habarlady qala ákimdigi.
Sonymen qatar, qaıta jańartý barysynda birde-bir kásipker saýda ornynsyz qalmaıtyny atap ótildi.
— Bazar ákimshiligi tarapynan barlyq saýdagerge balamaly saýda oryndary — ýaqytsha nemese turaqty oryndar usynylady. Qazirgi ýaqytta kásipkerlermen túsindirý jumystary júrgizilip jatyr, — dep málimdedi ákimdik.
Sondaı-aq bazar basshylyǵy turǵyndar men kásipkerlerdi tek resmı aqparatqa senýge shaqyrdy.
— Áleýmettik jelilerde taralyp jatqan rastalmaǵan aqparattarǵa senbeýlerińizdi jáne tek resmı derekkózderge ǵana súıenýlerińizdi suraımyz, — dep atap ótti vedomstvo ókilderi.
Budan buryn Shymkenttegi «Kóktem» bazary kóshiriletinin jazǵan edik.
