Shymkentte Baıdibek bı dańǵyly tórt aıǵa jartylaı jabylady

ShYMKENT. KAZINFORM – Shymkent qalasyndaǵy eń júktemesi joǵary joldardyń biri – Báıdibek bı dańǵylynda kólik qozǵalysyna kezeń-kezeńimen shekteý engiziledi. Shekteýler jazdyń basyna deıin jalǵasady. Buǵan kólik aıryǵy quramyndaǵy avtomobıl kópiriniń qurylysy sebep bolyp otyr.

Shymkent qalasynyń jolaýshylar kóligi jáne avtomobıl joldary basqarmasynyń málimetinshe, Báıdibek bı dańǵylynda avtokólik qozǵalysyna jartylaı shekteý qoıylady. Ózgerister kólik aıryǵyn salý jobasyn iske asyrýǵa baılanysty jáne kezeń-kezeńimen engiziledi.

Qurylys jumystary dańǵyldyń eki ýchaskesin qamtıdy. Birinshi ýchaske Tólemetov kóshesimen qıylystan Aqberen kóshesine deıingi aralyqty, ekinshi ýchaske sol qıylystan Qyzylqaıyń kóshesine deıingi bólikti qamtıdy.

Foto: Shymkent ákimdigi

Árbir ýchaskede qozǵalys eki aı merzimge shektelip, birjaqty qozǵalys uıymdastyrylady.

Vedomstvo joldyń tolyq jabylmaıtyny atap ótti. Alaıda qurylys kezeńinde qozǵalys syzbasy ózgerip, júrgizýshiler ýaqytsha jol belgilerine baǵdarlanýy qajet bolady.

– Bul sharalar qurylys jumystarynyń qaýipsizdigi men sapasyn qamtamasyz etý úshin qajet. Júrgizýshilerden ózgeristerdi aldyn ala eskerip, jol jaǵdaıyna muqııat nazar aýdarýdy suraımyz, – dep habarlady basqarmada.

Jalpy alǵanda, shekteýler shamamen tórt aıǵa sozylyp, jaz maýsymynyń basynda aıaqtalady.

Avtokólik júrgizýshilerine marshrýttaryn aldyn ala josparlap, kólik qozǵalysy tyǵyz ýchaskelerde asa saq bolý usynylady.

Buǵan deıin Shymkentte tranzıttik baǵyttaǵy sapasyz jol men keptelis turǵyndardyń ashýyn týǵyzǵany habarlaǵan bolatyn.