Shymkentte balalaryna qorlyq kórsetken anaǵa qatysty qylmystyq is qozǵaldy
ShYMKENT. KAZINFORM — Shymkentte kámeletke tolmaǵandarǵa qatygezdik kórsetkeni úshin qylmystyq is qozǵaldy. Aldyn ala boljam boıynsha týǵan anasy balalaryn azapqa salyp, óz is-áreketin «tártiptik shara» dep aqtaǵan.
Balalarǵa turmystyq zorlyq-zombylyq kórsetilýi múmkin degen habarlama mektep tarapynan túsken. Muǵalimder balalardyń denesi jaraqattanǵanyn baıqap, quqyq qorǵaý organdaryna habarlaǵan.
Ótinish boıynsha ıývenaldy jáne krımınaldyq polıtsııa qyzmetkerleri, sondaı-aq basqa da ýákiletti organdardyń ókilderi dereý otbasynyń turǵylyqty jerine barǵan.
— Shymkenttik polıtseılerge anasynyń balalarǵa dene jaraqatyn salýy jáne kámeletke tolmaǵandardy tárbıeleýdegi mindetterin oryndamaǵany týraly habarlama kelip tústi. Qylmystyq is qozǵaldy. Іstiń barlyq mán-jaıyn anyqtaý úshin keshendi jedel-tergeý sharalary júrgizilip jatyr, — dedi Shymkent qalalyq PD baspasóz qyzmetiniń jetekshisi Baǵlan Isataeva.
Otbasynda tórt bala bar. Olardyń ekeýi mektep jasynda bolsa, taǵy ekeýi 4 pen bir jasta. Aldyn ala málimet boıynsha turmystyq zorlyq-zombylyqqa úıdegi úlken uldar ushyraǵan. Anasy olardyń denesine ystyq útik basyp, aıaq-qoly, beti men denesin kúıdirip, shanyshqymen shanshyp tastaǵan. Áıeldiń aıtýynsha, bul is-áreketter «tyńdamaǵany úshin» qoldanylǵan. Balalar tek fızıkalyq aýyrsynýdy sezinip qoımaı, psıhologııalyq azapqa túsken.
— Aýyr jaraqat alǵan úlken balalar Shymkent qalalyq balalar aýrýhanasyna jetkizilip, baqylaýǵa alyndy. Tórt jasar bala kámeletke tolmaǵandardy beıimdeý ortalyǵyna, bir jastaǵy náreste ýaqytsha sábıler úıine ornalastyryldy, — dedi Shymkent qalalyq balalar quqyqtary jónindegi ýákil Aıjan Naımbekova.
Onyń aıtýynsha, bul otbasynyń turmysy qanaǵattanarlyq dep baǵalanǵan, sondyqtan qandaı da bir tirkeýge alynbaǵan.
Jınalǵan materıaldar áıeldi ata-ana quqyǵynan aıyrý máselesin qaraıtyn kámeletke tolmaǵandar isteri jáne olardyń quqyqtaryn qorǵaý jónindegi komıssııaǵa jiberiledi.
Tergeýge deıingi málimet boıynsha kúdiktiniń kúıeýi Frantsııaǵa jumys isteýge ketken, qazir shetelde. Áıeldiń psıhıkalyq buzylysy tekserildi, biraq psıhonevrologııalyq dıspanserdegi tekserý onyń aqyl-esi durys ekenin jáne psıhıkalyq aýrýy joq ekenin anyqtady.
Qazir sotqa deıingi tergeý amaldary jalǵasyp jatyr. Tergeý aıaqtalǵannan keıin materıaldar sotqa jiberiledi. Túpkilikti sheshim qabyldanǵanǵa deıin balalar áleýmettik mekemelerde qalady.
Buǵan deıin Shymkentte asyrandy 6 balany azaptaǵan «emshi» tergeý ızolıatorynda otyrǵany týraly jazdyq.