Shymkentte balalarǵa beriletin birjolǵy áleýmettik kómek jyl sońyna deıin tólenedi
ShYMKENT. KAZINFORM — Shymkentte múgedektigi bar balalar men ata-anasynyń qamqorlyǵynsyz qalǵan balalarǵa beriletin birjolǵy áleýmettik kómek 2026 jyldyń sońyna deıin tólenedi. Bul týraly qalalyq jumyspen qamtý jáne áleýmettik qorǵaý basqarmasy málimdedi.
Vedomstvonyń málimetinshe, tólem merziminiń keıinge shegerilýine normatıvtik-quqyqtyq aktilerge ózgerister engizý qajettigi sebep bolǵan. Qalalyq máslıhattyń taratylýyna baılanysty tıisti rásimder ýaqytynda aıaqtalmaǵan.
— Bastapqyda birjolǵy áleýmettik kómekti 25 qazan — Respýblıka kúnine oraı berý josparlanǵan edi. Alaıda tólem jasaý úshin tıisti normatıvtik-quqyqtyq aktilerge ózgerister engizý qajet. Jergilikti máslıhattyń taratylýyna jáne qajetti rásimderdiń aıaqtalmaýyna baılanysty tólem merzimi keıinge shegerildi. Tıisti sheshim qabyldanǵannan keıin qarajatty 2026 jyldyń sońyna deıin aýdarý josparlanyp otyr, — dep habarlady basqarma.
Birjolǵy áleýmettik kómek kámeletke tolmaǵandardyń eki sanatyna qarastyrylǵan:
— 18 jasqa deıingi múgedektigi bar balalarǵa — 5 AEK nemese 21 625 teńge;
— ata-anasynyń qamqorlyǵynsyz qalǵan balalarǵa — 20 AEK nemese 86 500 teńge.
Basqarma ókilderi tólemniń naqty kúni ázirge belgilenbegenin, tıisti sheshim qabyldanǵan soń qosymsha habarlanatynyn málimdedi.
— Múgedektigi bar balalardyń ata-analary men ata-anasynyń qamqorlyǵynsyz qalǵan balalardyń qamqorshylarynan tólem merziminiń ózgerýine túsinistikpen qaraýdy suraımyz, — delingen basqarma habarlamasynda.
Buǵan deıin Shymkentte 18 jasqa deıingi múgedektigi bar 8238 bala tirkelgeni habarlanǵan bolatyn. Osy sanattaǵy balalarǵa birjolǵy kómek kórsetýge 178,1 mln teńge qarastyrylǵan. Al ata-anasynyń qamqorlyǵynsyz qalǵan 720 balaǵa tólem jasaýǵa 62,3 mln teńge baǵyttaý josparlanǵan.
