Shymkentte balalardyń quqyqtaryn qorǵaý basqarmasy qurylady

ShYMKENT. KAZINFORM — Jaqyn kúnderi Shymkentte jasóspirimderdiń qaýipsiz ári kedergisiz damýyn qadaǵalaıtyn jańa basqarma jumysyn bastaıdy.

Shymkent qalasynda balalardyń quqyqtaryn qorǵaý baǵytynda jańa basqarma qurylady. Bul týraly qalalyq bilim basqarmasynyń basshysy Qýanysh Ysqaqov málimdedi.

Onyń aıtýynsha, bir aı kóleminde jańa basqarma óz jumysyn bastaıdy dep josparlanyp otyr.

— Naýryz aıynyń sońynda qala ákiminiń qaýlysy qabyldandy. Qazirgi tańda atalǵan qurylym ádilet departamentine tirkeýge joldandy. Jańa basqarmanyń qurylýy óńirdegi balalardyń quqyqtaryn qorǵaý júıesin kúsheıtip, qoldaý sharalaryn júıeleýge baǵyttalǵan, — dedi ol baspasóz máslıhatynda.

Brıfıng barysynda basqarma basshysy qalada jetim jáne ata-anasynyń qamqorlyǵynsyz qalǵan balalardy otbasylyq ortada tárbıeleýge basymdyq berilip otyrǵanyn atap ótti.

Spıkerdiń sózinshe, búginde qala boıynsha 817 jetim jáne ata-anasynyń qamqorlyǵynsyz qalǵan bala bar.

— Onyń ishinde 670 bala otbasylyq tárbıede ósip jatyr. Al 121 bala ómirlik qıyn jaǵdaıǵa tap bolǵan balalardy qoldaý ortalyǵynda tárbıelenip keledi. Sonymen qatar, № 6 arnaýly áleýmettik qyzmetterdi kórsetý ortalyǵynda 19 bala, kámeletke tolmaǵandardy beıimdeý ortalyǵynda 4 bala, al mamandandyrylǵan Bóbekter úıinde 3 bala ornalastyrylǵan. Áleýmettik mártebesine qaraı bul balalardyń 359-y — jetim, al 458-i ata-anasynyń qamqorlyǵynsyz qalǵandar sanatyna jatady, — dedi Qýanysh Ysqaqov.

Aıta keteıik, qazirgi tańda Shymkent qalasynda 294 mektep bar, onyń 164-i — memlekettik, al 130-y — jekemenshik. Onda 280 myńǵa jýyq oqýshy bilim alady.

Budan buryn Shymkentte oqýshylar arasynda 11 sýıtsıd faktisi tirkelgenin jazǵan edik.