Shymkentte balalar oıyn alańyndaǵy synǵan jabdyqtar turǵyndardy alańdatty
ShYMKENT. KAZINFORM — Shymkentte turǵyndar Mustafa Óztúrik kóshesindegi balalarǵa arnalǵan oıyn alańynyń jaǵdaıyna shaǵymdandy.
Olardyń aıtýynsha, alańdaǵy oıyn jabdyqtary jaramsyz kúıge túsip, balalardyń qaýipsizdigine qaýip tóndirip otyr.
Turǵyndardyń málimetinshe, «Hottabych» dúkenine qarama-qarsy ornalasqan oıyn alańyndaǵy qumsalǵysh qoqysqa tolǵan.
Syrǵanaqtardyń keıbiri synyp, átkenshekter paıdalanýǵa jaramsyz kúıge túsken. Sonymen qatar balalardyń qaýipsizdigine arnalǵan jumsaq tósenishterdiń birqatar bóligi jyrtylyp, ajyrap ketken.
Alańnyń jaryqtandyrylýy da turǵyndardy alańdatady. Olardyń sózinshe, aýmaqta bir ǵana jaryq baǵany bar, ol da tolyq jaryq bermeıdi. Sonyń saldarynan keshki ýaqytta oıyn alańy qarańǵy bolyp qalady.
— Bul jerde kún saıyn keshke balalar oınaıdy. Synǵan syrǵanaqtarǵa shyǵyp, júgirip júredi. Bir kúni syrǵanaq qulap, bala jaraqattanyp qala ma dep alańdaımyz, — deıdi turǵyndar.
Osyǵan baılanysty Shymkent qalasy Eńbekshi aýdany ákimdigi túsinik berdi.
— Bul shaǵym boıynsha «Eńbekshi» KMM tarapynan tıisti jumystar júrgizildi. Atap aıtqanda, oıyn alańy aýmaǵyndaǵy shashylǵan qoqys jınalyp, sanıtarlyq tazalyq jumystary atqaryldy. Sonymen qatar, oıyn alańyndaǵy synǵan jáne búlingen elementter retke keltirildi. Al ajyrap, kóterilip ketken jumsaq tósenishterdiń búlingen bólikterin qaıta tóseý boıynsha tıisti tapsyrma berildi. Jumystar belgilengen tártippen júrgiziledi, — dep habarlady ákimdik.
Buǵan deıin Shymkentte turǵyndar jolaıryq qurylysyndaǵy kólik keptelisine shaǵymdanǵanyn jazǵan edik.
