Shymkentte balabaqsha qyzmetkerlerine 3 aı boıy áleýmettik aýdarymdar tólenbegen

ShYMKENT. KAZINFORM – Shymkent qalasynda 36 memlekettik balabaqsha qyzmetkerleriniń mindetti zeınetaqy jarnalary men medıtsınalyq saqtandyrý tólemderi merziminen keshiktirilgen. Qazirgi bereshek somasy – 199 mln teńge.

Saldarynan balabaqsha mamandarynyń em qabyldaýda, bank qyzmetterin paıdalanýda qıyndyqtar týyndaǵan.

Qalalyq bilim basqarmasynyń málimetinshe, qaryzdyń paıda bolýyna basty sebep – keıbir balabaqsha uıymdarynyń basshylary tarapynan toptardy qalyptastyrý, balalardyń naqty barýy jáne kórsetiletin qyzmet sapasyn tıisti deńgeıde baqylaý qamtamasyz etilmegen.

– 2024 jylǵy qazan aıynda Shymkent qalasynda balabaqshalardy vaýcherlik qarjylandyrýdyń pılottyq jobasy iske qosyldy. Joba sheńberinde qabyldaý, kezekke qoıý jáne qarajat bólý protsesteri tolyqtaı tsıfrlandyrylǵan. Vaýcherlik júıe aıasynda qarjylandyrý kólemin anyqtaıtyn derekterde balabaqshaǵa barý deńgeıiniń tómendeýi kórsetilip, bul aýdarylatyn qarajattyń kólemin azaıtty. Nátıjesinde, mindetti tólemder boıynsha qaryzdyń paıda bolýyna sebep boldy. Qazirgi ýaqytta 36 memlekettik balabaqsha uıymyna qosymsha tólemderdi turaqtandyrý jáne mundaı jaǵdaılardyń boldyrmaý maqsatynda qajetti uıymdastyrýshylyq jáne tehnıkalyq sharalar qabyldandy, - delingen vedomstvonyń bizge usynǵan aqparatynda.

Qazirgi tańda qaryzdy óteý jumystary júrgizilip jatyr. Shymkent qalasynda bilim basqarmasyna qarasty 644 mektepke deıingi uıym bar. Onda 76 544 bala vaýcherlik júıe arqyly qarjylandyrylady. Bir balaǵa qarjylandyrý mólsheri – 55 659 teńge.

Budan buryn Shymkentte 86,3 mln teńge jalaqy qaryzyn óteýde zańbuzýshylyqtar anyqtalǵanyn jazǵan edik.