Shymkentte áıelin aıaýsyz uryp-soqqan er adam ustaldy
ShYMKENT. KAZINFORM — Áleýmettik jelide denesinde soqqy izderi bar áıeldiń bolǵan jaǵdaıdy aıtyp otyrǵan vıdeosy tarady. Týystarynyń aıtýynsha, oqıǵa eki kishkentaı balanyń kózinshe bolǵan.
Jelide jarııalanǵan vıdeoda beti qan-josa bolǵan áıeldiń jylap otyrǵany kórinedi. Jábirlenýshiniń týystarynyń aıtýynsha, kúıeýi buǵan deıin de oǵan birneshe ret kúsh qoldanyp, balaǵattap, óltiremin dep qorqytqan. Sondaı-aq olardyń aıtýynsha, er adam áıeliniń atyna 2 mln teńge kóleminde nesıe rásimdegen.
Quqyq qorǵaý organdary oqıǵany rastady.
— Shymkent qalasynyń polıtsııa qyzmetkerleri áıelge dene jaraqatyn saldy degen kúdikpen Túrkistan oblysynyń 25 jastaǵy turǵynyn ustady. Kúdikti ýaqytsha ustaý ızolıatoryna qamaldy. Oqıǵa 16 qyrkúıekke qaraǵan túni qala aýmaǵynda bolǵany anyqtaldy. Jábirlenýshiniń aryzy negizinde qylmystyq is qozǵaldy, — dep habarlady vedomstvo.
Tergeý barysy Shymkent qalasy polıtsııa departamenti basshylyǵynyń baqylaýynda.
Buǵan deıin Jambyl oblysynda jas ana qaza bolǵan edi. Onyń týystary ólimniń ózine qol jumsaý saldarynan bolǵanyna senbeıtinin aıtqan. Marqumnyń artynda segiz aılyq sábıi qalǵan.
Sondaı-aq Shymkentte er adam burynǵy áıeline qyshqyl shashyp, onyń denesine aýyr hımııalyq kúıik keltirgen oqıǵa qoǵamnyń nazaryn aýdarǵan bolatyn.
Otbasyndaǵy zorlyq-zombylyq faktilerine baılanysty Qazaqstannyń Bas múftıi úndeý jasap, áıelge qol kóterý er adamǵa laıyq emes ekenin atap ótti. Onyń aıtýynsha, otbasyndaǵy janjaldardyń saldary jyldar boıy jazylmaıtyn iz qaldyrýy múmkin.
