Shymkentte avtokólik jóndeý ǵımaratynan órt shyqty

ShYMKENT. KAZINFORM – Qarataý aýdanynda ornalasqan avtokólik jóndeý ǵımaratynan órt shyqty. Qalyń tútin qala turǵyndarynyń alańdaýshylyǵyn týdyrdy. 

Oqıǵa búgin Saıram shaǵynaýdanyndaǵy Ámir Temir kóshesinde boldy. Munda bir qabatty Garage tehnıkalyq qyzmet kórsetý stantsııasynyń ǵımaraty otqa oranǵan.

Órt týraly beınejazbalar áleýmettik jelilerde tez tarady. Kadrlarda ǵımarattan jalyn lapyldap shyǵyp, mańaıda adamdardyń jınalǵany baıqalady.

Tótenshe jaǵdaılar qyzmeti oqıǵa ornyna jetken kezde nysan ashyq jalynmen janyp jatqan. Órttiń taralýyna jol bermeý úshin órt sóndirýshiler sý jelilerin tartyp, sóndirý jumystaryna kiristi.

Shymkent qalalyq Tótenshe jaǵdaılar departamentiniń málimetinshe, órt týraly habar 112 pýltine saǵat 12:57-de túsken. Oqıǵa ornyna shaqyrtýdyń joǵary rangy jarııalanyp, qosymsha kúshter jiberildi. Alǵashqy órt sóndirý bólimsheleri habarlama túskennen keıin 10 mınýt ishinde jetken.

— Órtti sóndirýge 23 tehnıka men 74 qyzmetker jumyldyryldy. Sondaı-aq ákimdik tarapynan eki sý tasymaldaý kóligi men ekskavator tartyldy, - dep habarlady qalalyq TJD.

Qutqarýshylar 14:40-ta órtti oqshaýlap, keıin tolyq sóndirdi. Tilsiz jaý ǵımarat ishinde turǵan bir avtokólikti zaqymdady. Zardap shekkender joq.

Qazir mamandar janyp ketken ǵımarat bólikterin ajyratyp, qyzýy basylmaǵan jerlerde tolyq sóndirý jumystaryn júrgizip jatyr. 

Budan buryn Shymkentte gaz qubyrynan órt shyqqanyn jazǵan edik.