Shymkentte avtokólik ıeleri gaz tapshylyǵyna shaǵymdandy
ShYMKENT. KAZINFORM – Qalada janarmaıdyń bul túri ásirese tańerteńgi jáne keshki ýaqytta jetispeıdi. Júrgizýshiler aldyn ala jazylýǵa májbúr ekenin aıtady. Energetıka basqarmasy mınıstrlikke qosymsha suıytylǵan munaı gazyn bólý týraly ótinish jasady.
Tamyz aıynda bir lıtr avtogaz baǵasy 102 teńgege deıin kóterilgenine qaramastan, Shymkentte janar-jaǵarmaı tapshy bolyp otyr. Qalalyq energetıka jáne ınfraqurylymdy damytý basqarmasy suıytylǵan gazdyń ýaqytsha jetispeýshiligi avtomobılder sanynyń ósýine jáne aıdyń sońynda jetkizý kestesiniń ózgerýine baılanysty ekenin atap ótti.
- Avtokólik quraldary sanynyń artýyna jáne aıdyń sońynda jetkizý kestesiniń ózgerýine baılanysty Shymkentte suıytylǵan munaı gazynyń ýaqytsha tapshylyǵy baıqalady. Biz Energetıka mınıstrligine qosymsha otyn kólemin bólý týraly ótinish jiberdik. Qazirgi ýaqytta qajetti mólsherde bólinip, másele kezeń-kezeńimen sheshilip jatyr, - dep túsindirdi vedomstvodan.
Shymkentte 463 myńnan astam avtomobıl tirkelgen, onyń 15%-ǵa jýyǵy suıytylǵan gazdy paıdalanady. Jaǵdaı jyl saıyn gazdaǵy avtomobılder sanynyń ulǵaıýymen ǵana emes, sonymen qatar Shymkent AGQS-na janarmaı quıatyn Túrkistan oblysynan keletin júk mashınalary men avtomobılderdi qosa alǵanda, kóliktiń tranzıttik aǵynynyń ósýimen kúrdelenip keledi.
Ákimdik janarmaı quıý máseleleri basqa aımaqtardan kelgen júrgizýshilerdiń kóptiginen týyndaıtynyn rastaıdy.
- Gazdy paıdalanatyn bul avtomobılder qalalyq statıstıkada esepke alynbaıdy, bul tapshylyq týdyrýy múmkin, - dep atap ótti Shymkent qalasy ákiminiń orynbasary Sársen Quranbek.
Buǵan deıin únemdeý úshin gaz jabdyqtaryn ornatqan Soltústik Qazaqstan oblysynyń júrgizýshileri de avtogaz tapshylyǵyna tap bolǵan. Olardyń aıtýynsha, mundaı jaǵdaı jyl saıyn qaıtalanady. Keıbir qalalarda, máselen, Petropavlda gaz talon boıynsha satylady. Energetıka mınıstrligi Atyraý MÓZ-na josparly jóndeýmen suıytylǵan gazdy jetkizýdegi ýaqytsha kidiris sebebin túsindirdi.
Jaǵdaıdy turaqtandyrý úshin mınıstrlik qosymsha 500 tonna bóldi. Sondaı-aq mınıstrlik Soltústik Qazaqstan oblysynda benzın tapshylyǵy týraly aqparatty joqqa shyǵaryp, shyndyqqa janaspaıtynyn málimdedi.