Shymkentte avtobýs júrgizýshisin urǵan jasóspirimge qatysty qylmystyq is toqtatyldy

ShYMKENT. KAZINFORM – Aıyptyń jeńildetilýi jáne taraptardyń tatýlasýyna baılanysty sot qylmystyq isti toqtatty.

Kámeletke tolmaǵandardyń isteri jónindegi mamandandyrylǵan aýdanaralyq sotynda 17 jastaǵy jasóspirimge qatysty is qaraldy. Ol bastapqyda QK-niń 106-babynyń 1-bóligimen (densaýlyqqa qasaqana aýyr zııan keltirý) aıyptalǵan.

Alaıda prokýror basty sot talqylaýynda aıyptaýdy QK-niń 114-babynyń 3-bóligine (abaısyzda jábirlenýshiniń densaýlyǵyna aýyr zııan keltirý) aýystyrǵan.

Іs materıaldaryna sáıkes, aıyptalýshy 2025 jylǵy 12 maýsymda Shymkent qalasynyń «Bekjan» aıaldamasynda №52 avtobýstan jol aqysyn tólemeı túsip bara jatqan sátte, oǵan avtobýs júrgizýshisi, ıaǵnı jábirlenýshi jol aqysyn tóleýdi aıtqan.

– Aıyptalýshy osy sózderge ashýlanyp, jol aqysyn tólep, ári qaraı jábirlenýshige balaǵat sóz sóılep, syrtta sóılesýge shaqyrǵan. Sodan jábirlenýshi avtobýstan túsip, aıaldamada aıyptalýshymen sóılesýge shyqqan kezde, jábirlenýshiniń sol jaq tusynan soqqy jasap, abaısyzda jábirlenýshiniń densaýlyǵyna aýyr zııan keltirgen, – dep málimdedi sot.

Prokýror QK-niń 68-baby 1-bólimine sáıkes, taraptardyń tatýlasýyna baılanysty isti toqtatý týraly surady. Jábirlenýshi men aıyptalýshy ózara shaǵymy joq ekenin rastady.

– Sot QK-niń 114-babynyń 3-bóligimen kináli dep tanylǵan A.-ny jábirlenýshimen tatýlasyp, keltirilgen zııandy qalpyna keltirýine baılanysty qylmystyq jaýapkershilikten bosatyp, oǵan qatysty qylmystyq is toqtatyldy, – dep naqtylady sottyń baspasóz qyzmeti.

Úkim zańdy kúshine enbegen.

Budan buryn Shymkentte taksıdi taspen urǵan boıjetken qamaýǵa alynǵanyn jazǵan edik.