Shymkentte aýyr atletıkadan jastar arasynda Qazaqstan chempıonaty ótip jatyr
ASTANA. KAZINFORM – Shymkentte 2026 jyldyń 10 aqpanynda resmı túrde ashylǵan aýyr atletıkadan 23 jasqa deıingi jastar arasynda Qazaqstan chempıonaty ótip jatyr, dep habarlaıdy Kazinform.
10-16 aqpan aralyǵynda ótetin týrnırge elimizdiń 16 aımaǵynan úzdik atanýǵa jáne jańa jeke rekord ornatýǵa daıyn 200-den astam eń myqty sportshy bas qosty.
Chempıonattyń ashylý saltanaty is-sharanyń aýqymdylyǵyn kórsetti. Oǵan Shymkent qalasy ákiminiń birinshi orynbasary Aıdyn Kárimov, UOK vıtse-prezıdenti – Aýyr atletıka federatsııasynyń basshysy Gadjı Gadjıev, respýblıkalyq Aýyr atletıka federatsııasynyń vıtse-prezıdenti, Shymkent Aýyr atletıka federatsııasynyń prezıdenti Murat Joldyqojaev, aımaqtyq federatsııalardyń basshylary, QR Aýyr atletıkadan ulttyq qurama músheleri jáne tanymal qazaqstandyq gımnast Álııa ıÝsýpova qatysty.
Jarystyń ashylý saltanatynda jattyqtyrýshylarǵa qala ákimi Ǵabıt Syzdyqbekovtiń atynan sportty damytýǵa qosqan úlesteri úshin alǵys hattar tabystaldy. Shymkent qalalyq federatsııasynyń basshylyǵy jarysqa qatysýshylarǵa arnalǵan júlde qoryn jarııalady.
- Biz aýyr atletıka boıynsha sportshylardy daıyndap, joǵary deńgeıde ulttyq chempıonattar uıymdastyrý úshin barlyq qajetti jaǵdaılardy jasaýǵa tyrysyp jatyrmyz. Bul qazaqstandyq atletterdi yntalandyryp, olardyń halyqaralyq deńgeıde sátti óner kórsetýi úshin qajetti mańyzdy qadam. Bizdiń maqsatymyz - sportty nasıhattap, deni saý, jastardy qalyptastyrý, - dedi chempıonattyń bas uıymdastyrýshysy, «AMANAT» partııasy Shymkent qalalyq fılıalynyń tóraǵasy Murat Joldyqojaev.
Chempıonat 16 aqpanǵa deıin jalǵasady. Qatysýshylar julqa jáne serpe kóterý erejelerinde joǵary deńgeıdegi tehnıkalyq sheberlikterin kórsetip otyr. Bul jarys – Qazaqstan ulttyq quramasynyń negizgi quramyna bolashaǵynan úmit kúttiretin sportshylardy irikteýdiń mańyzdy kezeńi.
Osyǵan deıin Qazaqstan aýyr atletıka federatsııasy dopıngke baqylaýdy kúsheıtkeni týraly jazdyq.
