Shymkentte aýyl sharýashylyǵy qurylymdarynyń jartysynan kóbi sanaqtan onlaın ótken

ASTANA. KAZINFORM — Shymkent qalasynda aýyl sharýashylyǵy qurylymdarynyń 56,5% Ulttyq aýyl sharýashylyǵy sanaǵyna sanaq.gov.kz saıty arqyly onlaın formatta qatysqan, dep habarlaıdy Ulttyq statıstıka bıýrosy.

Bıýronyń derekter katalogyna sáıkes, óńirde 7 myńnan astam aýyl sharýashylyǵy qurylymy tirkelgen. Olardyń ishinde 809 — zańdy tulǵa bolsa, 6 myńnan astamy — sharýa jáne fermer qojalyqtary men jeke kásipkerler.

Ulttyq statıstıka bıýrosynyń basshysy Maqsat Turlybaevtyń aıtýynsha, qatysý deńgeıiniń salystyrmaly túrde tómen bolýyna birqatar sebep bar. Atap aıtqanda, kóptegen sharýa qojalyqtary is júzinde eshqandaı qyzmet atqarmaıdy.

— Sanaq barysynda biz buryn memlekettik qoldaý sharalaryn alý úshin zańdy túrde tirkelgen, biraq shyn máninde jumys istemeıtin qojalyqtardy anyqtadyq. Keıbireýleri buryn túrli jyldary ashylǵanymen, keıinnen jumys istemeı, jabylmaı qalǵan. Sonymen qatar, Shymkent qalasynyń aýmaǵynda tirkelip, is júzinde qaladan tys jerde ornalasqan sharýashylyqtar da bar. Qazir bizdiń ıntervıýerler osy mekenjaılar boıynsha baryp, ıelerin taýyp, olardyń naqty mártebesin anyqtap jatyr. Bul jumys 20 qazanǵa deıin jalǵasady, — dedi Bıýro basshysy.

Aýyl sharýashylyǵy sanaǵy aıasynda sharýashylyqtardy esepke alý máseleleri Shymkent qalasy ákiminiń birinshi orynbasary Aıdyn Kárimovpen ótken kezdesýde talqylandy.

Shymkent qalasyna jasaǵan sapary aıasynda Bıýro basshysy qııar men qyzanaq ósiretin, ónimderin óńirge taratatyn jáne Qazaqstannyń basqa oblystaryna eksporttaıtyn «IMG corporation» JShS-niń jylyjaı keshenine de bardy. Bul kásiporyn sanaqqa onlaın kezeń kezinde qatysyp úlgergen.

— Aýyl sharýashylyǵy daqyldaryn ósirýmen aınalysatyn osyndaı sharýashylyqtardyń sanaqqa qatysýy óte mańyzdy. Bul óńirdiń aýyl sharýashylyǵy boıynsha naqty kórinisin kórýge jáne jylyjaı óndirisiniń áleýetin durys baǵalaýǵa múmkindik beredi, — dep atap ótti Bıýro basshysy.

Qazaqstanda aýyl sharýashylyǵy sanaǵynyń oflaın kezeńi 2025 jylǵy 20 qazanǵa deıin jalǵasady. Barlyq suraq boıynsha 1446 baılanys ortalyǵyna (kún saıyn saǵat 9:00–den 21:00–ge deıin, qońyraý shalý tegin) habarlasýǵa bolady.

Budan buryn Túrkistan oblysynda Ulttyq aýyl sharýashylyǵy sanaǵynyń oflaın kezeńi aıasynda 441 ıntervıýer jumys atqaryp jatqany habarlandy. Bul elimiz boıynsha eń joǵary kórsetkish