Shymkentte áýe kemelerine tehnıkalyq qyzmet kórsetetin ortalyq salynady
ASTANA. KAZINFORM — Shymkent qalasynda SCAT avıakompanııasy men Boeing kompanııasynyń seriktestigi aıasynda júzege asyrylyp jatqan avıatsııalyq tehnıkaǵa tehnıkalyq qyzmet kórsetý jáne jóndeý jónindegi angarlyq ortalyqtyń (MRO) qurylysyna kapsýla salýdyń saltanatty rásimi ótti. Bul týraly Kólik mınıstrligi málim etti.
Ortalyqty qurý bastamasy Memleket basshysynyń AQSh-qa jumys sapary barysynda Boeing korporatsııasynyń basshylyǵymen ótken kezdesýde halyqaralyq deńgeıde talqylanyp, strategııalyq yntymaqtastyqty keńeıtý perspektıvalary aıqyndalǵan bolatyn.
Rásimge Shymkent qalasynyń ákimi Ǵabıt Syzdyqbekov, kólik vıtse-mınıstri Talǵat Lastaev, sondaı-aq Boeing kompanııasynyń kommertsııalyq satý jáne marketıng jónindegi vıtse-prezıdenti Pol Rıgı qatysty.
— Jańa keshen Ortalyq Azııadaǵy áýe kemelerine tehnıkalyq qyzmet kórsetý jáne jóndeý salasyndaǵy iri ortalyqqa aınalyp, Qazaqstan Respýblıkasynyń avıatsııa salasyndaǵy mańyzdy ınfraqurylymdyq jobalardyń biri bolmaq, — delingen habarlamada.
Joba Boeing óndirisindegi áýe kemelerine qyzmet kórsetýge baǵyttalǵan tolyq óndiristik tsıkldi zamanaýı ortalyq qurýdy kózdeıdi. Atap aıtqanda, Boeing 737 (Classic/NG/MAX), Boeing 757/767, sondaı-aq Boeing 777 keń fıýzelıajdy áýe kemelerine tehnıkalyq qyzmet kórsetý jáne bolashaqtaǵy perspektıvaly baǵdarlamalardy iske asyrý josparlanyp otyr.
Osyǵan baılanysty qosymsha Boeing áýe kemelerin satyp alý múmkindigi de qarastyrylmaq.
— Keshen 10 gektar aýmaqta ornalasady. Injenerlik-tehnıkalyq ınfraqurylymnyń jalpy aýdany 45 000 sharshy metrden asady, onyń ishinde angar mańyndaǵy 6 gektardan astam áýe kemeleriniń turaq aımaǵy bar. Jalpy sany keminde 15 joǵary tehnologııalyq nysan salý josparlanǵan, — deep habarlady vedomstvodan.
Jobany iske asyrý Qazaqstanǵa sheteldik avıakompanııalardyń áýe kemelerin tehnıkalyq qyzmet kórsetýge tartýǵa, salalyq quzyretterdi keńeıtýge jáne jańa joǵary bilikti jumys oryndaryn ashýǵa múmkindik beredi. Nátıjesinde halyqaralyq deńgeıdegi zamanaýı servıstik baza qalyptasady.
Bıyl temirjol, avtojol jáne avıatsııa salasynda qandaı aýqymdy jobalar iske asatynyn myna siltemeden oqyńyz.
