Shymkentte aýdıt nátıjesinde 43,3 mlrd teńgeniń zań buzýshylyǵy áshkere boldy
ShYMKENT. KAZINFORM — Shymkentte memlekettik mekemelerdiń kiris-shyǵys qarjysyna onlaın bıýdjettik monıtorıng júrgizile bastady. Qazir pılottyq joba aıasynda bilim, densaýlyq, sport jáne mádenıet basqarmalarynda aýdıttik tekseris júrgizilip, birqatar qarjylyq zańbuzýshylyq anyqtaldy.
Shymkent qalasy boıynsha ishki memlekettik aýdıt departamenti basshysynyń orynbasary Baqbergen Quralbaevtyń málimdeýinshe, bıylǵy jyldyń alǵashqy toqsanynda departament 19 aýdıttik is-shara ótkizgen. Onyń ishinde 3-eýi josparly, 16-sy jospardan tys tekserý bolǵan. Tekserý nátıjesinde jalpy kólemi 43,3 mlrd teńge kóleminde zań buzý anyqtalǵan.
— Onyń 14,3 mlrd teńgesi — qarjylyq buzýshylyqtarǵa qatysty. Atap aıtqanda bıýdjetke ótelýge jatatyn soma — 203,7 mln teńge. Sondaı-aq qurylys salasyndaǵy oryndalmaǵan jumystardy qalpyna keltirýge 13,4 mlrd teńge, býhgalterlik esep arqyly qalpyna keltirýge 674,5 mln teńge baǵyttalǵan. Al rásimdik sıpattaǵy buzýshylyqtar kólemi 29 mlrd teńgege jetti. Onyń ishinde memlekettik satyp alý zańnamasyn buzý derekteri 28,9 mlrd teńgeni quraǵan, — dedi spıker.
Júrgizilgen 19 aýdıttiń 14-inde qarjylyq zań buzýshylyqtar anyqtalyp, bıýdjet qarajatyn negizsiz paıdalaný úlesi 74 paıyzdy kórsetti.
Tekserý qorytyndysy boıynsha 7 laýazymdy tulǵa tártiptik jaýapkershilikke tartyldy. Sonymen qatar 2 azamat ákimshilik jaza alyp, 432 myń teńge kóleminde aıyppul tólegen. Budan bólek 1,2 mlrd teńgege qatysty 3 aýdıt materıaly protsessýaldyq sheshim qabyldaý úshin quqyq qorǵaý organdaryna joldanǵan.
Sondaı-aq jyl qorytyndysy boıynsha eń táýekeli joǵary tólemderge júrgizilgen taldaý nátıjesinde qurylys basqarmasy, jolaýshylar kóligi jáne avtomobıl joldary basqarmasy, tsıfrlandyrý basqarmasy qamtylǵan. Atalǵan mekemelerdegi 106 tólemniń 64-i boıynsha qaýip rastaldy.
Baqbergen Quralbaevtyń aıtýynsha, «Onlaın bıýdjettik monıtorıng» pılottyq jobasy tórt salada júzege asyrylyp jatyr. Joba aıasynda bilim, densaýlyq, sport jáne mádenıet basqarmalaryna 918 táýekeldi tólem boıynsha jalpy somasy 293,3 mln teńgege 45 habarlama joldanǵan.
— Onyń ishinde 11,9 mln teńge nemese 4 paıyzy qyzmetkerlerge eńbekaqy tóleý kezinde negizsiz artyq aýdarylǵany anyqtaldy, — dedi ol.
Sonymen qatar departament jyl basynan beri 8503 memlekettik satyp alý protsedýrasyna kameraldyq baqylaý júrgizgen. Nátıjesinde memlekettik satyp alý salasynda 25 mln teńgege zańnama talaptarynyń buzylǵany belgili boldy.
Budan buryn Shymkent ákimdigi Naýryzǵa arnalǵan rolıkterge jumsalǵan qarajatqa qatysty túsinik bergenin jazǵan edik.
