Shymkentte aýdan ákimine aıyppul salyndy
ShYMKENT. KAZINFORM – Shymkent qalasy Qarataý aýdanynyń ákimine aıyppul salyndy.
Qarataý aýdanynyń prokýratýrasy memlekettik satyp alýdy júzege asyrý jáne bıýdjet qarajatyn ıgerý kezinde zańdylyqtyń saqtalýyna taldaý júrgizgen. Onyń nátıjesi boıynsha konkýrstyq qujattamada memelekettik satyp alý boıynsha zańnamada kózdelmegen talaptardy kórsetý derekteri belgili bolǵan. Sondaı-aq áleýetti ónim berýshini biliktilik talaptaryna sáıkes emes dep zańsyz taný jáne óz mindettemelerin tıisinshe oryndamaǵan jetkizýshilerge shara qoldanbaý faktileri anyqtalǵan.
Qalalyq prokýratýra málimetinshe, aýdan ákimine qatysty prokýrorlyq qadaǵalaý aktisi boıynsha Ákimshilik quqyq buzýshylyq týraly kodekstiń 207-baby 5, 7 jáne 10-bólikteri boıynsha (Qazaqstan Respýblıkasynyń Memlekettik satyp alý týraly zańnamasyn buzý) ákimshilik quqyq buzýshylyq týraly 9 hattama toltyryldy. Memleket kirisine 332 280 teńge kóleminde aıyppul óndirildi.