Shymkentte ataýly áleýmettik kómek alýshylar azaıdy

ShYMKENT. KAZINFORM – Shymkentte ataýly áleýmettik kómek alýshylar bir jylda 63,7 paıyzǵa tómendegen. 

QR Áleýmettik kodeksi talaptaryna sáıkes, ataýly áleýmettik kómek jan basyna shaqqandaǵy ortasha tabysy kedeılik sheginen aspaıtyn azamattarǵa shartty nemese shartsyz aqshalaı kómek retinde beriledi.

Shymkent qalasy jumyspen qamtý jáne áleýmettik qorǵaý basqarmasynyń málimetinshe, 2026 jyldyń alǵashqy toqsanynda qaladaǵy 1 519 az qamtylǵan otbasyǵa tıesili 7 771 adamǵa ataýly áleýmettik kómek taǵaıyndalǵan.

– Bul kórsetkish ótken jyldyń sáıkes kezeńimen salystyrǵanda aıtarlyqtaı tómendegen. Máselen, 2025 jyly 5 158 otbasydaǵy 27 238 adam atalǵan kómekti alǵan. Nátıjesinde ataýly áleýmettik kómek alýshylar sany 63,7 paıyzǵa azaıǵan, - delingen basqarma usynǵan aqparatta.

Mamandar bul ózgeristi halyqty jumyspen qamtý baǵytynda júrgizilgen júıeli sharalardyń tıimdiligimen baılanystyrady.

– Sonymen qatar bir jastan alty jasqa deıingi balalardy qoldaý sharalary da jalǵasyp jatyr. Ataýly áleýmettik kómek taǵaıyndalǵan kezeńde ár balaǵa aı saıyn 1,5 aılyq eseptik kórsetkish kóleminde, ıaǵnı 6 488 teńge mólsherinde qosymsha tólem qarastyrylǵan. Esepti kezeńde bul kómek 1 320 otbasydaǵy 2 595 balaǵa taǵaıyndaldy, - dedi vedomstvo ókilderi.

Aıta keteıik, bıyl Shymkent qalasynda 31 myńnan astam adamdy jumyspen qamtý sharalaryna tartý josparlanǵan.

Budan buryn 2025 jyly elde 292 myńnan astam adamǵa ataýly áleýmettik kómek kórsetilgenin jazǵan edik.