Shymkentte áskerı kolledj ashyldy
ShYMKENT. KAZINFORM – Sabyr Rahymov atyndaǵy áskerı kolledjdiń ashylý saltanatyna Qorǵanys mınıstri avıatsııa general-leıtenanty Dáýren Qosanov pen Shymkent qalasynyń ákimi Ǵabıt Syzdyqbekov qatysty. Bul týraly Qorǵanys mınıstrligi málim etti.
Dástúr boıynsha Keńes Odaǵynyń Batyry general-maıor Sabyr Rahymovtyń eskertkishine gúl shoqtary qoıyldy. Oqý ornynyń jeke quramy, ákimdik, qoǵam ókilderi, Qarýly kúshterdiń ardagerleri men «Jas sarbaz» áskerı-patrıottyq qozǵalysynyń tárbıelenýshileri aty ańyzǵa aınalǵan áskerı qolbasshyny bir mınýt únsiz turyp eske aldy.
Áskerı orkestrdiń saltanatty súıemeldeýimen Qorǵanys mınıstri avıatsııa general-leıtenanty Dáýren Qosanov pen Shymkent qalasynyń ákimi Ǵabıt Syzdyqbekov oqý korpýsynyń basty kireberisinde lenta qıdy.
Qorǵanys mınıstri saltanatty is-sharaǵa qatysýshylardy aıtýly oqıǵamen quttyqtady.
— Jańa kolledj batyldyqtyń, áskerı boryshqa adaldyqtyń jáne Otanǵa degen súıispenshiliktiń sımvoly — dańqty komandır, Keńes Odaǵynyń tuńǵysh qazaq generaly Sabyr Rahymovtyń esimimen atalady. Sabyr Rahymov — abyroı men batyldyqtyń bıik úlgisin kórsetken qazaqtardyń biri. Sender oqıtyn orynǵa erekshe mıssııa júktelgen. Ol mindet — qıyn jaǵdaılarda sheshim qabyldaýǵa, kásibı jáne jaýapkershilikpen áreket etýge qabiletti joǵary bilikti serjanttardy daıarlaý. Shymkent qalasynyń ákimine garnızon áskerı qyzmetshilerine turaqty túrde kóńil bólip, qoldaý kórsetkeni úshin, áskerı bólimder men mekemelerdi abattandyrý jáne áleýmettik qamtamasyz etý máselelerindegi eńbegi úshin shynaıy alǵysymdy bildiremin, — dep atap ótti avıatsııa general-leıtenanty Dáýren Qosanov.
Qorǵanys mınıstri rızashylyq belgisi retinde Ǵabıt Syzdyqbekovke «El qorǵany» vedomstvolyq medalin tabys etti. Mınıstr oqytýshylar men komandırlerge tárbıelenýshilerge kásibı daǵdylardy ǵana emes, rýhanı-adamgershilik qundylyqtardy, ulttyq rýh pen patrıotızmdi boılaryna sińirińder dedi. Al bolashaq serjanttarǵa myqty densaýlyq, oqýda jaqsy nátıjeler, táýelsiz memlekettiń órkendeýi jolyndaǵy tolaǵaı tabystar men jetistikter tiledi.
Áskerı kolledj ulany Sabyr Qoshqarbaı sóz sóılep, oqýǵa jasalǵan jaǵdaılar úshin alǵysyn bildirip, áskerı mamandyqty ıgerýge bel býǵan kýrstastarynyń jaqsy kózqarastaryn bildirdi.
Erekshe kózge túsken áskerı qyzmetshilerdi marapattaý rásimi kolledj jeke quramynyń saltanatty marshymen jáne áskerı tehnıkanyń úlgileri qoıylǵan alańda qoıan-qoltyq urys elementterin kórsetýmen aıaqtaldy.
Ulandardyń kórsetiliminen keıin qonaqtar oqý korpýsyn, kazarmany, kitaphanany, murajaıdy, ashanany, sport zaly men stadıondy aralady.
Eske sala keteıik, 2 tamyzda Qorǵanys mınıstrliginiń áskerı kolledjderine qujat qabyldaý bastalǵanyn jazǵan edik.