Shymkentte asyrap alǵan balalaryn qınaǵan emshiniń áıeli tergelip jatyr

ShYMKENT. KAZINFORM - Shymkentte qamqorlyǵyna jáne asyrap alǵan balalaryn qınaǵan jergilikti emshi isine sot núkte qoıǵan bolatyn. Búginde onyń áıeli tergelip jatyr.

6 balany qorlaǵan U.Smanovtyń áıeliniń ústinen Qylmystyq kodekstiń 140-baby boıynsha is qozǵalǵan. Bul aqparatty qalalyq Polıtsııa departamenti rastady. 

«Atalǵan fakti boıynsha jergilikti turǵynnyń áıeline qatysty kámeletke tolmaǵan balany tárbıeleý jónindegi mindetterdi oryndamaǵany úshin qylmystyq is qozǵalǵanyn habarlaımyz. Qazirgi ýaqytta tergeý amaldary júrgizilip jatyr»,- delingen qalalyq polıtsııa málimetinde. 

Shymkentte jergilikti emshiniń 6 balany asyrap alyp, olarǵa ıt pen mysyqtyń etin bergenin, úsh jyldan beri azaptap kelgenin jazǵan bolatynbyz. Keıinirek emshi týraly tyń derek shyqty.

Emshi isinen soń bilim salasynyń birqatar qyzmetkeri jazalandy. Sonymen qatar qalalyq densaýlyq saqtaý basqarmasyndaǵylar balalardyń qazirgi jaǵdaıy týraly aıtyp berdi.

Budan ózge Kazinform redaktsııasyna emshi asyrap alǵan balalar týraly tyń derek kelip tústi. Ondaǵy málimette búldirshinderdiń biri atalǵan otbasyǵa nebári 1,5 aılyǵynda qamqorlyqqa berilgeni kórsetilgen. Qamqorlyqqa berilgen balalardyń arasynda úsh aılyq egizder de bar.

Balalardyń biriniń ájesi Óskemende turatyny belgili boldy. Ol Kazinform tilshisine bergen suhbatynda jıen nemeresi asyraýǵa qalaı berilgenin aıtyp berdi.

Astana qalalyq Bilim basqarmasyna emshiniń qamqorlyǵyna berilgen egiz balalar elordaǵa qaıtarylatynyn aıtty.

Qoǵamdyq rezonans týdyrǵan is sotqa kelip tústi.

Kóp uzamaı asyrap alǵan balalaryn qorlady degen aıyp taǵylyp otyrǵan emshiniń isin qaraıtyn sýdıa belgili boldy.

ІІM Kazinform agenttiginiń resmı saýalyna bergen jaýabynda asyrap alǵan alty balany azaptady degen kúdikke ilingen emshiniń mamandandyrylǵan aýrýhanada jatqanyn aıtty.

Al Oqý-aǵartý mınıstrligi bala quqyqtaryn qorǵaý komıteti shymkenttik emshi aqyl-esi saý degen qujat ótkizgenin málimdedi.

Asyrap alǵan balalaryn qorlaǵan emshiniń 31 jyl buryn adam óltirgeni rastaldy.

Emshiniń advokatynyń aıtýynsha, ol psıhıkalyq aýytqýyna baılanysty 1995 jyldan beri esepte turǵan. Oǵan shızofrenııa dıagnozy qoıylǵan.

U.Smanovqa qatysty is Shymkent qalasynyń kámeletke tolmaǵandardyń isteri jónindegi mamandandyrylǵan aýdanaralyq sotynda qaraldy. Sot aktisimen emshi psıhıkalyq aýytqýyna baılanysty esepte turǵandyqtan jazadan qutyldy. Oǵan mamandandyrylǵan úlgidegi psıhıatrııalyq statsıonarda májbúrlep emdeý taǵaıyndaldy.