Shymkentte artyq júk artqan júk kólikteri avtomatty túrde anyqtalady
ShYMKENT. KAZINFORM – 15 qazannan bastap megapolıste aýyr júk kólikteriniń salmaqtyq baqylaý erejelerin buzý derekteri avtomatty túrde tirkeletin bolady.
Qaladaǵy júk tasymalynyń negizgi aǵymy áýejaı mańyndaǵy Tamerlan tasjolynda, A-2 aınalma jolynda, sondaı-aq Isfıdjab, Yntymaq jáne Bozaryq shaǵynaýdandarynyń aýmaǵynda shoǵyrlanǵan. Joldardyń merziminen buryn búlinýine jol bermeý jáne qozǵalys qaýipsizdigin qamtamasyz etý maqsatynda munda zamanaýı avtomattandyrylǵan ólsheý stantsııalary ornatylyp jatyr.
Bul júıe kólik quraldarynyń salmaǵy men júktemesin naqty ýaqyt rejıminde eseptep, zańsyz júk tasymalyn anyqtaýǵa múmkindik beredi.
Qazir Shymkent – Saıram – Qaramurt baǵyty boıynsha úsh beket iske qosyldy:
• Jibek joly kóshesi, Mártóbe shaǵynaýdanyndaǵy musylman zıraty mańynda;
• Berdiqoja batyr kóshesi, Qarasý ózeniniń ústindegi kópir janynda;
• Ámir Temir kóshesinde.
Qalalyq jolaýshylar kóligi jáne avtomobıl joldary basqarmasynyń málimetinshe, bir oske túsetin ruqsat etilgen salmaq 8 tonna bolyp belgilengen. Alaıda keıbir júk kólikteri 18 tonnaǵa deıin qysym túsirip, jol jabyndysyn jyldam tozdyryp qana qoımaı, ózge júrgizýshiler úshin de eleýli qaýip týdyrady.
– Endi artyq júk artqan árbir kólik avtomattandyrylǵan júıe arqyly tirkeledi. Zańbuzýshylarǵa qoldanystaǵy zańnamaǵa sáıkes ákimshilik sharalar qoldanylady, – dedi vedomstvo ókilderi.
Bıyl jobany júzege asyrýǵa bıyl 308,6 mıllıon teńge bólingen. Al 2026 jyly taǵy alty stantsııa ornatý josparlanyp otyr. Nátıjesinde jobanyń jalpy quny 1 mıllıard teńgeden asatyn bolady.
Aıta keteıik, budan buryn Shymkentte qurylys alańynda jumysshy qaza tapqanyn jazǵan bolatynbyz.