Shymkentte Arman Ábdeshovke qatysty isten keıin basqarmaǵa ýaqytsha basshy keldi
ShYMKENT. KAZINFORM — Shymkent qalasynyń sáýlet jáne qala qurylysy basqarmasynyń ýaqytsha basshysy bolyp basqarma basshysynyń orynbasary Dáýren Muqanov taǵaıyndaldy.
Bul sheshim qazirgi basshy Arman Ábdeshovke qatysty qylmystyq is qozǵalǵannan keıin qabyldandy.
Dáýren Muqanov 1991 jyly Almaty qalasynda dúnıege kelgen. Ol kásibı jolyn sáýlet salasynan bastaǵan. 2010 jyly Qazaq bas sáýlet -qurylys akademııasy janynydǵy Sáýlet kolledji bitirip, keıin Qazaq bas sáýlet-qurylys akademııa kampýsynda oqýyn jalǵastyryp, sáýletshi mamandyǵyn aldy. Keıinnen biliktiligin keńeıtip, Almaty ýnıversıtetinde jáne D. Qonaev atyndaǵy Eýrazııalyq zań akademııasynda bilim alyp, zańgerlik mamandyq boıynsha oqýdy támamdady.
Alǵashqy kásibı qadamdaryn ol jeke sektorda jasap, Almaty oblysyndaǵy «Talǵar Sáýlet» kompanııasynda sáýletshi bolyp eńbek etti. 2018 jyldan bastap memlekettik qyzmetke aýysyp, Talǵar aýdandyq sáýlet jáne qala qurylysy bóliminde jumys istedi. Munda ol bas mamannyń mindetin ýaqytsha atqarýshydan bastap, bólim basshysyna deıingi qyzmettik joldan ótti.
2022 jyly Muqanov Talǵar qalasynyń qurylys, sáýlet jáne qala qurylysy bólimin basqardy. Odan keıin Qarasaı aýdanynda da osy saladaǵy bólim basshysynyń mindetin atqaryp, tájirıbe jınaqtady. Budan soń jeke sektorǵa qaıta oralyp, Almaty qalasyndaǵy «Caspiy ProTek» kompanııasynda joba bas sáýletshisi bolyp jumys istedi.
2025 jyldan bastap Dáýren Muqanov Shymkent qalasynda eńbek jolyn jalǵastyryp, jumyspen qamtý jáne áleýmettik qorǵaý basqarmasynda qyzmet etti. Sol jyldyń mamyr aıynda ol qalanyń sáýlet jáne qala qurylysy basqarmasy basshysynyń orynbasary bolyp taǵaıyndaldy, al tamyz aıynda atalǵan vedomstvonyń ýaqytsha basshysy mindetin atqarýǵa kiristi.
Aıta keteıik, budan buryn Shymkentte sáýlet basqarmasynyń basshysy Arman Ábdeshov ustalǵanyn jazǵan bolatynbyz.
Al keshe, Shymkent ákimdigi sáýlet basqarmasynyń basshysy ustalǵanyn rastady.