Shymkentte aryq ústine ornatylǵan aıaldama turǵyndardy alańdatty
ShYMKENT. KAZINFORM — «Shymqala» tarıhı-mádenı kesheni mańynda aıaldamanyń sý aǵatyn aryqtyń ústine ornatylýy turǵyndardyń alańdaýshylyǵyn týǵyzdy.
Áleýmettik jeli qoldanýshylary aıaldamanyń ornatylýyn synǵa alyp, onyń turǵyndar úshin qanshalyqty qaýipsiz ári qolaıly ekenin suraǵan.
Osyǵan baılanysty Shymkent qalasynyń jolaýshylar kóligi jáne avtomobıl joldary basqarmasy túsinik berdi.
Basqarmanyń málimetinshe, atalǵan aıaldama pavılony eki kún buryn ornatylǵan.
— Qazirgi ýaqytta turǵyndarǵa qolaıly jaǵdaı jasaý maqsatynda tıisti jumystar júrgizilip jatyr. Ony kelesi aptada tolyq aıaqtaý josparlanǵan. Aıaldama mańyn retke keltirý barysynda plıtalar tóselip, basqa da qajetti sharalar atqarylady. Jumys barysyna túsinistikpen qaraýlaryńyzdy suraımyz, — delingen vedomstvo jaýabynda.
Buǵan deıin Shymkentte jolaıryq qurylysy barysynda zoobaq qorshaýynyń bir bóligi jer astynda qalyp qoıǵany týraly jazǵanbyz.
