Shymkentte aptap ystyqtan elektr jelileri isten shyǵyp, keı aýdanda jaryq sónip qalǵan
ShYMKENT. KAZINFORM – Aptap ystyqtan Shymkenttegi elektr jelilerinen aqaý shyǵyp, keı aýdandarda jaryq sónip qalǵan.
Qalada aýa temperatýrasy 43 gradýstan asyp, elektr energııasyna suranys kúrt ósken. Bul jaǵdaı jelidegi jabdyqtardyń shamadan tys júktelýine jáne buzylýyna ákeldi. Sonymen qatar jerasty kabel jelileriniń búlinýine bógde uıymdardyń kelisilmegen jer qazý jumystary da sebep boldy.
«Ońtústik Jaryq Tranzıt» kompanııasy apattyq-qalpyna keltirý brıgadalaryn qosymsha jumyldyryp, jaryq berý qyzmetin tezirek qalpyna keltirip jatyr.
Kompanııa ókilderi turǵyndardan atalǵan keleńsiz jaǵdaıǵa túsinistikpen qaraýdy eskertip, qolaısyzdyq úshin keshirim surady.
- Elektrıkter jumysyn kúsheıtip, jaryqty turaqty jetkizýge bar kúshin salyp jatyr, - delingen habarlamada.
Sınoptıkterdiń boljamynsha, aldaǵy kúnderi aptap ystyq birtindep báseńdeıdi. 25 maýsymda aýa temperatýrasy +26°S deıin tómendep, bultty aýa raıy saqtalady, jaýyn-shashyn bolmaıdy. 26 maýsymda kúndizgi aýa temperatýrasy +28...+30°S, 27 maýsymda +30...+32°S deıin kóteriledi.
Aıta keteıik, budan buryn Shymkenttegi Badam ózeni jaǵasynda qum men qıyrshyq tas zańsyz óndirilip kelgenin jazǵan bolatynbyz.